લંડન, તા. 24: બ્રિટનના રાજકારણમાં 'રિફોર્મ યુકે' પાર્ટીએ એક એવો રાજકીય ભૂકંપ લાવ્યો છે જેણે ઈમિગ્રેશનના મુદ્દે આખા યુરોપમાં ચર્ચા જગાવી છે. બ્રેક્ઝિટના ચાણક્ય ગણાતા નિગેલ ફેરાજની આગેવાની હેઠળની આ પાર્ટીએ વચન આપ્યું છે કે જો તેઓ સત્તા પર આવશે, તો બ્રિટનમાં ઘૂસણખોરી કરી રહેલા ગેરકાયદેસર સ્થળાંતર કરનારાઓને રોકવા માટે અમેરિકાની ICE (Immigration and Customs Enforcement) શૈલીની એક શક્તિશાળી દેશનિકાલ એજન્સી બનાવશે.
"રાષ્ટ્રીય સુરક્ષા કટોકટી"
રિફોર્મ યુકેના પોલિસી ચીફ ઝિયા યુસુફે દક્ષિણ ઈંગ્લેન્ડના ડોવર બંદર પર પત્રકારોને સંબોધતા ઈમિગ્રેશનના વધતા સ્તરને "રાષ્ટ્રીય સુરક્ષા કટોકટી" અને "આક્રમણ" ગણાવ્યું હતું. તેમણે સ્પષ્ટ કર્યું કે પાર્ટી એક નવો 'માસ ડિપોર્ટેશન એક્ટ' લાવશે, જે ન્યાયાધીશોને દેશનિકાલની પ્રક્રિયામાં દખલ કરતા અટકાવશે.
શું છે રિફોર્મની 'આમૂલ' યોજના?
•    નવી એજન્સી: અમેરિકાની ICE જેવી જ એક એજન્સી (ડિપોર્ટેશન કમાન્ડ) બનાવવામાં આવશે, જેની પાસે વાર્ષિક 2,88,000 વ્યક્તિઓને દેશનિકાલ કરવાની ક્ષમતા હશે.
•    વિઝા પ્રતિબંધો: જે દેશો (જેમ કે પાકિસ્તાન, સોમાલિયા, સીરિયા, અફઘાનિસ્તાન) પોતાના ગેરકાયદેસર નાગરિકોને પાછા લેવાનો ઇનકાર કરશે, તેમના પર બ્રિટન કડક વિઝા પ્રતિબંધો લાદશે.
•    લાભો પર રોક: વિદેશી નાગરિકોને મળતી સરકારી સહાય અને લાભોની ચૂકવણી બંધ કરવામાં આવશે.
•    માનવ અધિકાર સંધિ: જરૂર પડશે તો બ્રિટન આંતરરાષ્ટ્રીય માનવ અધિકાર સંધિઓમાંથી પણ બહાર નીકળી જશે જેથી દેશનિકાલની પ્રક્રિયા ઝડપી બની શકે.
રાજકીય જંગ જામશે
બ્રિટનમાં 2029માં ચૂંટણી યોજાવાની છે, પરંતુ અત્યારથી જ ઓપિનિયન પોલમાં રિફોર્મ યુકે લોકપ્રિયતા મેળવી રહી છે. જોકે, શાસક લેબર પાર્ટીએ આ યોજનાની ટીકા કરતા જણાવ્યું છે કે તેઓ પહેલેથી જ 60,000 થી વધુ ગેરકાયદેસર લોકોને હાંકી કાઢી ચૂક્યા છે અને રિફોર્મની નીતિઓ દેશને વિભાજીત કરનારી છે.
બ્રિટનમાં વર્ષ 2025માં રેકોર્ડબ્રેક 41,000 થી વધુ આશ્રય શોધનારાઓ નાની હોડીઓ દ્વારા સમુદ્ર પાર કરીને પહોંચ્યા હતા. આ આંકડો સામાન્ય જનતામાં રોષ પેદા કરી રહ્યો છે, જેનો ફાયદો ઉઠાવીને રિફોર્મ યુકે હવે "બ્રિટન ફર્સ્ટ" ના નારા સાથે સત્તાના સપના જોઈ રહી છે.