નવી દિલ્હી:  એશિયાના આકાશમાં અત્યારે પાંચમી પેઢીના સ્ટીલ્થ ફાઇટર જેટ્સને લઈને ગરમાવો જોવા મળી રહ્યો છે. ચીને પહેલેથી જ તેનું ઘાતક J-20 વિમાન સરહદ નજીક તૈનાત કરી દીધું છે, જ્યારે પાકિસ્તાન પણ ચીન પાસેથી સ્ટીલ્થ ટેકનોલોજી મેળવવા એડીચોટીનું જોર લગાવી રહ્યું છે. આ સંજોગોમાં ભારત માટે પોતાની હવાઈ સર્વોપરિતા જાળવી રાખવી અનિવાર્ય બની ગઈ છે. સૂત્રોના જણાવ્યા મુજબ, ભારતીય વાયુસેના  રશિયાના સૌથી શક્તિશાળી અને રડારથી બચી શકે તેવા 'સુખોઈ Su-57' વિમાનોને પોતાના કાફલામાં સામેલ કરવા માટે મોટો ઓર્ડર આપી શકે છે. અહેવાલો અનુસાર, IAF લગભગ ૪૦ જેટલા Su-57 જેટ્સ માટે સોદો કરી શકે છે, જે ભારતની રાતોની ઊંઘ હરામ કરનારા પડોશી દેશો માટે જોખમની ઘંટડી સમાન છે.

Su-57 ની સૌથી મોટી ખાસિયત તેની ‘સ્ટીલ્થ’ ક્ષમતા છે, એટલે કે આ વિમાન દુશ્મનના રડારમાં ઝડપાતું નથી. તેની ખાસ ડિઝાઇન અને રડાર-શોષક મટિરિયલ તેને આકાશમાં એક અદ્રશ્ય શિકારી બનાવે છે. આ વિમાન આર્ટિફિશિયલ ઇન્ટેલિજન્સ  અને સુપર-એડવાન્સ્ડ એવિઓનિક્સથી સજ્જ છે, જે યુદ્ધ દરમિયાન પાઇલટને ‘ઇન્ટેલિજન્ટ ક્રૂ સપોર્ટ’ પૂરો પાડે છે. તે આફ્ટરબર્નરના ઉપયોગ વિના પણ સુપરસોનિક ગતિએ ઉડી શકે છે, જેના કારણે તે ઓછું ઇંધણ વાપરીને લાંબા અંતર સુધી દુશ્મનો પર ત્રાટકી શકે છે. તેની પાસે એવા ઘાતક મિસાઇલ્સ છે જે હવામાંથી હવામાં અને હવામાંથી જમીન પરના લક્ષ્યોને સચોટ રીતે વીંધી શકે છે.

ભારત અત્યારે તેના પોતાના સ્વદેશી પાંચમી પેઢીના ફાઇટર જેટ પર ઝડપથી કામ કરી રહ્યું છે, પરંતુ તેને વાયુસેનામાં સત્તાવાર રીતે સામેલ થતા ૨૦૩૫ સુધીનો સમય લાગી શકે છે. આગામી એક દાયકા સુધી સર્જાયેલી આ સુરક્ષાની ‘ખાલી જગ્યા’ ને ભરવા માટે Su-57 શ્રેષ્ઠ વિકલ્પ મનાઈ રહ્યો છે. સેન્સર ફ્યુઝન ટેકનોલોજી દ્વારા આ વિમાન વાસ્તવિક સમયમાં જમીન પરના કંટ્રોલ રૂમ અને અન્ય વિમાનો સાથે ગુપ્ત ડેટા શેર કરી શકે છે, જે આધુનિક ડિજિટલ યુદ્ધમાં ભારતને મોટી લીડ અપાવશે. હવે જોવાનું એ રહેશે કે રશિયા સાથેનો આ સંભવિત સોદો ક્યારે ફાઈનલ થાય છે અને ક્યારે ભારતનું આકાશ આ અદ્રશ્ય શિકારીના ગુંજારવથી ગુંજી ઉઠે છે.