ચંદીગઢ | તા.૨૫: ચંદીગઢ જિલ્લા અદાલતનું પરિસર આજે માત્ર કાનૂની દલીલોનું જ નહીં, પરંતુ એક અભૂતપૂર્વ રાજકીય ઘટનાનું સાક્ષી બન્યું છે. શિરોમણી અકાલી દળના દિગ્ગજ નેતા બિક્રમ સિંહ મજીઠિયાએ પક્ષથી છેડો ફાડી ચૂકેલા વરિષ્ઠ નેતાઓ પ્રેમ સિંહ ચંદુમાજરા અને સુરજીત સિંહ રાખરાના જાહેરમાં ઘૂંટણિયે પડીને આશીર્વાદ લેતા પંજાબના રાજકારણમાં નવી ચર્ચાઓએ જોર પકડ્યું છે. આ અચાનક થયેલી મુલાકાતનો વીડિયો સોશિયલ મીડિયા પર આગની જેમ ફેલાઈ રહ્યો છે.

દુશ્મની ભૂલીને દેખાઈ દોસ્તી

અહેવાલો મુજબ, કોર્ટ પરિસરમાં જ્યારે આ નેતાઓ સામસામે આવ્યા ત્યારે વાતાવરણ અત્યંત મૈત્રીપૂર્ણ જોવા મળ્યું હતું. જે નેતાઓ એકબીજા પર આક્ષેપબાજી કરતા હતા, તેઓ લાંબા સમય સુધી ગંભીર ચર્ચાઓમાં વ્યસ્ત જોવા મળ્યા હતા. મજીઠિયાની આ નમ્રતાને માત્ર પરંપરાગત આદર તરીકે નહીં, પરંતુ પક્ષમાં પડેલી તિરાડને પૂરવાના માસ્ટર પ્લાન તરીકે જોવામાં આવી રહી છે.

‘સુધાર લહેર’ વિરુદ્ધ ‘એકતા અભિયાન’

નોંધનીય છે કે છેલ્લા કેટલાક સમયથી અકાલી દળમાં ભીષણ આંતરિક વિખવાદ ચાલી રહ્યો છે. ચંદુમાજરા અને સુરજીત રાખરા જેવા વરિષ્ઠ નેતાઓએ હાઈકમાન્ડની કાર્યશૈલી સામે બળવો પોકારી "શિરોમણી અકાલી દળ સુધાર લહેર" ના નામે અલગ ચોકો રચ્યો હતો. હવે જ્યારે મજીઠિયા પોતે આ વરિષ્ઠ નેતાઓનું માન જાળવવા આગળ આવ્યા છે, ત્યારે એવા સંકેતો મળી રહ્યા છે કે અકાલી દળ પોતાના વિખરાયેલા સભ્યોને ફરી એકઠા કરવા માટે આક્રમક રીતે પ્રયાસ કરી રહ્યું છે.

રાજકીય વિશ્લેષકોનું શું કહેવું છે?

રાજકીય નિષ્ણાતો માને છે કે પંજાબમાં બદલાતા રાજકીય સમીકરણો વચ્ચે અકાલી દળ માટે અસ્તિત્વ ટકાવી રાખવા એકતા અનિવાર્ય છે. મજીઠિયાએ અગાઉ પણ જાહેરમાં બળવાખોર નેતાઓને પરત આવવા અપીલ કરી હતી. કોર્ટના આ દ્રશ્યો આગામી સમયમાં પક્ષના બંને જૂથોને એક પ્લેટફોર્મ પર લાવવા માટે સેતુ સમાન સાબિત થઈ શકે છે.

શું આ મુલાકાત બાદ અકાલી દળમાં સુખદ અંત આવશે કે ફરી કોઈ નવો વિવાદ સર્જાશે? તે તો આવનારો સમય જ કહેશે, પરંતુ હાલમાં તો મજીઠિયાના ‘આશીર્વાદ’ પંજાબના ગલી-ચોરામાં ચર્ચાનો વિષય બન્યા છે.