નવી દિલ્હી | તા.૨૫: વડાપ્રધાન નરેન્દ્ર મોદી ફરી એકવાર ઇઝરાયલના પ્રવાસે છે. છેલ્લા નવ વર્ષમાં તેમની આ બીજી ઐતિહાસિક મુલાકાત છે, જેમાં તેઓ વડાપ્રધાન બેન્જામિન નેતન્યાહૂ સાથે તેલ અવીવમાં દ્વિપક્ષીય મંત્રણા કરશે. આ મુલાકાતને લઈને રાજદ્વારી ગરમાવો તો છે જ, પરંતુ સાથે જ એક રસપ્રદ સવાલ એ પણ ચર્ચાઈ રહ્યો છે કે - શું ખરેખર ઇઝરાયલીઓ ભારતીયો કરતા વધુ ધનવાન છે? અને જો હા, તો બંને વચ્ચે કેટલું અંતર છે?

રોજની કમાણી ₹૯,૦૦૦!

આંકડાઓ પર નજર કરીએ તો ઇઝરાયલીઓની કમાણી ભારતીયો કરતા ઘણી વધારે છે. ઇઝરાયલમાં એક વ્યક્તિની સરેરાશ વાર્ષિક આવક આશરે $40,000 (લગભગ ₹33 લાખથી વધુ) છે. જો આ આંકડાને મહિનામાં વહેંચીએ તો તે ₹2.7 લાખ પ્રતિ માસ થાય છે. આનો અર્થ એ થયો કે એક સરેરાશ ઇઝરાયલી દિવસના આશરે ₹9,000 કમાય છે. તેની સરખામણીમાં ભારતમાં સરેરાશ માસિક આવક મોટાભાગના ક્ષેત્રોમાં ₹15,000 થી ₹30,000 ની વચ્ચે જોવા મળે છે.

શા માટે ઇઝરાયલ ‘સુપર પાવર’ છે?

ઇઝરાયલને વિશ્વમાં ‘સ્ટાર્ટઅપ નેશન’ તરીકે ઓળખવામાં આવે છે. ટેકનોલોજી, સંરક્ષણ પ્રણાલી, સાયબર સિક્યુરિટી અને એડવાન્સ એગ્રીકલ્ચર (કૃષિ) ક્ષેત્રે ઇઝરાયલ દુનિયાનું નેતૃત્વ કરે છે. ત્યાંના લોકો હાઇ-ટેક ઉદ્યોગો સાથે જોડાયેલા છે, જેના કારણે તેમની આવક ઉચ્ચ સ્તરે રહે છે. ભારત અત્યારે મધ્યમ આવક ધરાવતા દેશોમાં આવે છે, જ્યારે ઇઝરાયલ ઉચ્ચ આવક ધરાવતા વિકસિત દેશોની યાદીમાં સામેલ છે.

જીવન ખર્ચ પણ આસમાને

વધુ કમાણીની સાથે ઇઝરાયલમાં રહેવાનું ખર્ચ પણ ભારત કરતા અનેકગણું વધારે છે. સામાન્ય જીવનશૈલી માટે ત્યાં દર મહિને ₹33,000 થી ₹50,000 નો ખર્ચ થાય છે, જે ભારતના નાના શહેરોમાં આખા પરિવારના ખર્ચ કરતા પણ વધુ હોઈ શકે છે. તેલ અવીવ જેવા શહેરો તો રહેવા માટે વિશ્વના સૌથી મોંઘા શહેરોમાં ગણાય છે.

પીએમ મોદીની મુલાકાતનું મહત્વ

પીએમ મોદીની આ મુલાકાત દરમિયાન સંરક્ષણ અને ટેકનોલોજી સિવાય કૃષિ ક્ષેત્રે મહત્વના કરારો થવાની સંભાવના છે. ભારત ઇઝરાયલની હાઈ-ટેક ખેતી અને જળ વ્યવસ્થાપન પદ્ધતિ શીખવા માંગે છે, જેથી ભારતીયોની માથાદીઠ આવકમાં પણ વધારો કરી શકાય. ભારતનો GDP ભલે વિશ્વમાં ઝડપથી વધી રહ્યો હોય, પરંતુ માથાદીઠ આવકની બાબતમાં ઇઝરાયલ હજુ પણ માઈલો આગળ છે.