નવી દિલ્હી | તા.25: દેશના શહેરી ગરીબ અને મધ્યમ વર્ગના પરિવારો માટે કેન્દ્ર સરકાર તરફથી મોટી ભેટ મળી છે. પ્રધાનમંત્રી આવાસ યોજના-શહેરી 2.0 (PMAY-U 2.0) હેઠળ સરકારે વધુ 2,87,618 નવા મકાનોના નિર્માણના પ્રસ્તાવને લીલી ઝંડી આપી દીધી છે. આ મંજૂરી સાથે જ હવે આ યોજના અંતર્ગત મંજૂર કરાયેલા કુલ મકાનોનો આંકડો 13.61 લાખને વટાવી ગયો છે. આ નિર્ણયથી લાખો પરિવારોને માથે પાકી છત મળશે.

મહિલાઓના નામે હશે ઘરની માલિકી

આ યોજનાની સૌથી મોટી વિશેષતા એ છે કે તેમાં સામાજિક સમાનતા પર ભાર મૂકવામાં આવ્યો છે. મંજૂર કરાયેલા કુલ મકાનોમાંથી 1.60 લાખથી વધુ મકાનો મહિલાઓને ફાળવવામાં આવ્યા છે, જે મહિલા સશક્તિકરણની દિશામાં મોટું પગલું છે. આ ઉપરાંત, 22,581 મકાનો વરિષ્ઠ નાગરિકો માટે અને સમાજના વંચિત એવા ટ્રાન્સજેન્ડર સમુદાય માટે પણ 8 મકાનો અનામત રાખવામાં આવ્યા છે. SC, ST અને OBC વર્ગના લાભાર્થીઓ માટે પણ ચોક્કસ સંખ્યામાં આવાસો નિર્ધારિત કરાયા છે.

16 રાજ્યોમાં નિર્માણની ત્રણ અલગ શ્રેણીઓ

કેન્દ્રીય સચિવ શ્રીનિવાસ કાટિકીથલાની અધ્યક્ષતામાં મળેલી બેઠકમાં નક્કી થયા મુજબ, આ મકાનો ગુજરાત, મહારાષ્ટ્ર, રાજસ્થાન, મધ્યપ્રદેશ અને ઉત્તર પ્રદેશ સહિત 16 રાજ્યોમાં બનાવવામાં આવશે. યોજનાને મુખ્ય ત્રણ ભાગમાં વહેંચવામાં આવી છે:

• પોતાની જમીન પર બાંધકામ: 1.66 લાખ મકાનો (લાભાર્થી પોતે બનાવશે).
• ભાગીદારી આવાસ: 1.09 લાખ મકાનો (સરકાર અને બિલ્ડરની ભાગીદારી).
• ભાડાના આવાસ: 12,846 મકાનો (ઓછી આવક ધરાવતા લોકો માટે ભાડેથી ઘર).

આધુનિક ટેકનોલોજીના પ્રદર્શન માટે ‘ડેમો પ્રોજેક્ટ’

સરકારે માત્ર ઘર જ નહીં, પરંતુ ગુણવત્તાયુક્ત બાંધકામ પર પણ ભાર મૂક્યો છે. છત્તીસગઢ, પુડુચેરી અને રાજસ્થાનમાં ત્રણ ‘ડેમો હાઉસિંગ પ્રોજેક્ટ્સ’ (DHPs) ને મંજૂરી અપાઈ છે. અહીં 40-40 મકાનોના યુનિટ્સ આધુનિક અને ઓછા ખર્ચાળ ટેકનોલોજીથી બનાવવામાં આવશે, જે ભવિષ્યના શહેરી આવાસ માટે એક મોડેલ તરીકે કામ કરશે.

આ નવી મંજૂરીથી શહેરોમાં વસતા ગરીબ પરિવારોમાં ખુશીની લહેર જોવા મળી રહી છે. સરકારનો લક્ષ્‍ય છે કે આગામી સમયમાં દરેક પાત્રતા ધરાવતા પરિવાર પાસે પોતાનું ઘર હોય.