નવી દિલ્હી | તા.25: દેશની સેવા કરવાનું સપનું જોતા યુવાનો માટે મોટા અને સારા સમાચાર સામે આવ્યા છે. ભારતીય સેના (આર્મી) બાદ હવે ભારતીય વાયુસેનાએ પણ અગ્નિવીર ભરતી માટેની વય મર્યાદામાં એક વર્ષનો વધારો કરવાની જાહેરાત કરી છે. આ નિર્ણયથી એવા હજારો યુવાનોને ફાયદો થશે જેઓ અગાઉ વય મર્યાદા વટાવી જવાને કારણે અરજી કરી શક્યા નહોતા. હવે અગ્નિવીર વાયુ ભરતી 2026 માટે મહત્તમ વય મર્યાદા 21 વર્ષથી વધારીને 22 વર્ષ કરવામાં આવી છે.

અરજી કરવાની તારીખ અને વય મર્યાદા

વાયુસેનાએ જણાવ્યું છે કે જે ઉમેદવારો અગાઉ ફોર્મ ભરવાનું ચૂકી ગયા છે, તેમના માટે અરજી પ્રક્રિયા ફરીથી શરૂ કરવામાં આવશે. પાત્ર ઉમેદવારો 3 માર્ચથી 10 માર્ચ, 2026 સુધી સત્તાવાર વેબસાઇટ પર જઈને ઓનલાઇન અરજી કરી શકશે. નવા નિયમ મુજબ, ઉમેદવારનો જન્મ 1 જાન્યુઆરી, 2005 થી 1 જુલાઈ, 2009 ની વચ્ચે થયેલો હોવો જોઈએ. સંરક્ષણ મંત્રાલયના મતે, આ ફેરફારથી વધુમાં વધુ પ્રતિભાશાળી યુવાનો વાયુસેનામાં જોડાવા માટે પ્રેરાશે.

શૈક્ષણિક લાયકાત અને ફી

• વિજ્ઞાન વિષયો: ધોરણ 12 (10+2) માં ગણિત, ફિઝિક્સ અને અંગ્રેજી સાથે કુલ 50% માર્ક્સ હોવા જોઈએ.
• અન્ય વિષયો: કોઈપણ પ્રવાહમાં 50% માર્ક્સ સાથે 12મું ધોરણ પાસ.
• અરજી ફી: તમામ શ્રેણીના ઉમેદવારો માટે ₹550 + 18% GST રાખવામાં આવી છે.

પસંદગી પ્રક્રિયાના ત્રણ તબક્કા

અગ્નિવીર વાયુ બનવા માટે ઉમેદવારોએ ત્રણ કઠિન તબક્કાઓમાંથી પસાર થવું પડશે. પ્રથમ તબક્કામાં ઓનલાઇન લેખિત પરીક્ષા યોજાશે. તેમાં સફળ થનાર ઉમેદવારોએ બીજા તબક્કામાં શારીરિક કસોટી (PFT) આપવી પડશે, જેમાં પુરુષોએ 7 મિનિટમાં અને મહિલાઓએ 8 મિનિટમાં 1.6 કિમીની દોડ પૂર્ણ કરવાની રહેશે. અંતિમ તબક્કામાં વાયુસેનાના ધોરણો મુજબ તબીબી તપાસ (Medical) કરવામાં આવશે.

આકર્ષક પગાર અને ‘સેવા નિધિ’

પસંદ પામેલા અગ્નિવીરોને પ્રથમ વર્ષે ₹30,000 માસિક પગાર મળશે, જે ચોથા વર્ષ સુધીમાં વધીને ₹40,000 થશે. 4 વર્ષની સેવાના અંતે, અગ્નિવીરોને આશરે ₹10.04 લાખનું ‘સેવા નિધિ’ પેકેજ આપવામાં આવશે. આ ઉપરાંત, શ્રેષ્ઠ પ્રદર્શન કરનારા 25% અગ્નિવીરોને વાયુસેનામાં કાયમી કેડર તરીકે જોડાવાની તક પણ મળશે.