નવી દિલ્હી | તા.25: હિંદ મહાસાગરના પેટાળમાં કુદરતે એક એવું રૌદ્ર સ્વરૂપ ધારણ કર્યું છે જેણે સમગ્ર વિશ્વના હવામાનશાસ્ત્રીઓને સ્તબ્ધ કરી દીધા છે. ‘હોરાસિયો’ (Horacio) નામનું ઉષ્ણકટિબંધીય ચક્રવાત માત્ર ૨૪ કલાકમાં જ એક વિશાળકાય રાક્ષસમાં પરિવર્તિત થઈ ગયું છે. તેને વર્ષ ૨૦૨૬નું અત્યાર સુધીનું સૌથી શક્તિશાળી ‘સુપર ટાયફૂન’ જાહેર કરવામાં આવ્યું છે. સેટેલાઇટ તસવીરોમાં આ વાવાઝોડાની ‘આંખ’ એટલી સ્પષ્ટ અને ભયાનક દેખાઈ રહી છે કે તે તેની વિનાશક શક્તિની સાક્ષી પૂરે છે.

257 કિમીની રફ્તાર: કુદરતનો પ્રકોપ

કેટેગરી-5 નો દરજ્જો મેળવનાર ‘હોરાસિયો’ ના કેન્દ્રમાં પવનની ગતિ ૨૫૭ કિલોમીટર પ્રતિ કલાક સુધી પહોંચી ગઈ છે. આટલી ઝડપ વિશાળ ઈમારતોને પત્તાના મહેલની જેમ ધરાશાયી કરવા માટે પૂરતી છે. મેડાગાસ્કરની પૂર્વમાં ઉદ્ભવેલા આ તોફાને બધાને અચરજમાં મૂકી દીધા છે, કારણ કે માત્ર એક જ દિવસમાં તેની ગતિમાં ૩૫ માઈલ પ્રતિ કલાકનો તોતિંગ વધારો થયો છે. દરિયાની સપાટીનું ૨૮ ડિગ્રીથી વધુ તાપમાન આ તોફાન માટે બળતણનું કામ કરી રહ્યું છે.

શું ભારત પર ખતરો છે?

ભારત માટે રાહતના સમાચાર એ છે કે આ સુપર ટાયફૂન હાલમાં માનવ વસાહતોથી ઘણું દૂર દરિયાની મધ્યમાં પોતાની શક્તિ બતાવી રહ્યું છે. ભારતીય હવામાન વિભાગ (IMD) મુજબ, ‘હોરાસિયો’ હાલમાં દક્ષિણ તરફ ઠંડા પાણીના પ્રદેશોમાં આગળ વધી રહ્યું છે. જેમ જેમ તે ઠંડા પાણીના સંપર્કમાં આવશે, તેમ તેમ તેની શક્તિ ઘટવા લાગશે. ભારત, મોરેશિયસ કે અન્ય કોઈ ભૂમિગત વિસ્તાર પર અત્યારે કોઈ સીધો ખતરો જણાતો નથી. જોકે, દરિયાઈ ટ્રાફિક અને જહાજો માટે આ ‘દરિયાઈ રાક્ષસ’ અત્યંત જોખમી સાબિત થઈ શકે તેમ છે.

પર્યાવરણ માટે લાલબત્તી

વૈજ્ઞાનિકો ‘હોરાસિયો’ ને ગ્લોબલ વોર્મિંગની એક ગંભીર ચેતવણી માની રહ્યા છે. ગરમ થઈ રહેલા મહાસાગરો વાવાઝોડાને વધુ ઝડપથી અને વધુ વિનાશક રીતે તીવ્ર બનાવી રહ્યા છે. જો પર્યાવરણને બચાવવા માટે અત્યારે જ પગલાં નહીં લેવામાં આવે, તો ભવિષ્યમાં આવા ‘સુપર સ્ટોર્મ્સ’ માનવજાત માટે મોટું સંકટ બની શકે છે.

ઉત્તર ભારતના હવામાનમાં પલટો

એકતરફ સમુદ્રમાં વાવાઝોડું છે, તો બીજી તરફ ઉત્તર ભારતમાં વેસ્ટર્ન ડિસ્ટર્બન્સ સક્રિય થઈ રહ્યું છે. IMD મુજબ ૨૬ થી ૨૮ ફેબ્રુઆરી દરમિયાન હિમાલયના વિસ્તારોમાં હળવો વરસાદ અને હિમવર્ષા થઈ શકે છે, જોકે તેની પાછળ ચક્રવાત ‘હોરાસિયો’ નું કોઈ સીધું કનેક્શન નથી.