વોશિંગ્ટન: અમેરિકામાં નોકરી કરવાનું સપનું જોતા ભારતીય કુશળ કામદારો અને ત્યાં સ્થાયી થયેલા આઈટી પ્રોફેશનલ્સ માટે એક મહત્વના સમાચાર સામે આવ્યા છે. યુએસ ડિપાર્ટમેન્ટ ઓફ લેબર (DOL) દ્વારા રજૂ કરવામાં આવેલા "H-1B અને PERM રોજગાર માટે વેતન સુરક્ષામાં સુધારો" શીર્ષકવાળા નવા પ્રસ્તાવને મેનેજમેન્ટ અને બજેટ કાર્યાલય (OMB) તરફથી લીલી ઝંડી મળી ગઈ છે. આ ફેરફાર બાદ હવે વિદેશી કામદારોને ચૂકવવામાં આવતા લઘુત્તમ વેતનમાં મોટો વધારો થઈ શકે છે.

શું છે આ નવો નિયમ?

આ પ્રસ્તાવિત નિયમનો મુખ્ય ઉદ્દેશ્ય H-1B વિઝા અને PERM (શ્રમ પ્રમાણપત્ર) કાર્યક્રમો હેઠળ વિદેશી કામદારોના વેતન સુરક્ષાને મજબૂત કરવાનો છે. ૨૦ ફેબ્રુઆરી, ૨૦૨૬ના રોજ આ દરખાસ્તની નિયમનકારી સમીક્ષા પૂર્ણ કરવામાં આવી છે. જો આ નિયમ અમલમાં આવશે, તો અમેરિકન નોકરીદાતાઓએ H-1B કામદારોને અત્યારના સ્તર કરતા વધુ લઘુત્તમ પગાર ચૂકવવો પડશે. આ પગલું અમેરિકાના સ્થાનિક કામદારોના હિતોનું રક્ષણ કરવા અને વિદેશી કામદારોના સસ્તા શ્રમના ઉપયોગને રોકવા માટે લેવામાં આવ્યું હોવાનું મનાય છે.

ભારતીયો પર કેવી અસર પડશે?

અમેરિકામાં H-1B વિઝા મેળવનારાઓમાં સૌથી મોટી સંખ્યા ભારતીયોની છે. નવા નિયમોને કારણે:

• પગારમાં વધારો: જે કામદારો પહેલેથી ત્યાં છે અથવા નવા જવાના છે, તેમના લઘુત્તમ વેતન સ્તરમાં સુધારો થવાની શક્યતા છે.
• નોકરીદાતાઓ પર બોજ: ગૂગલ, માઈક્રોસોફ્ટ અને ઇન્ફોસિસ જેવી મોટી આઈટી કંપનીઓ માટે વિદેશી કર્મચારીઓને હાયર કરવાનું મોંઘું બનશે.
• નાના વ્યવસાયોને અસર: પ્રસ્તાવમાં સ્પષ્ટ કરાયું છે કે આ નિયમ ખાનગી ક્ષેત્ર અને નાના એકમોને પણ અસર કરશે, જેથી ભરતી પ્રક્રિયા વધુ કડક બની શકે છે.

આગળનું પગલું શું હશે?

સમીક્ષા પૂર્ણ થયા પછી, હવે આ નિયમ ટૂંક સમયમાં 'ફેડરલ રજિસ્ટર'માં પ્રકાશિત કરવામાં આવશે. અહીં તેનો સંપૂર્ણ ટેક્સ્ટ જાહેર થશે અને સ્ટેકહોલ્ડર્સ પાસેથી અભિપ્રાયો મંગાવવામાં આવશે. આ પ્રક્રિયા બાદ તેને કાયદેસર રીતે લાગુ કરવામાં આવશે. આ ફેરફારને આર્થિક રીતે અત્યંત મહત્વપૂર્ણ અને 'મેજર રૂલ' તરીકે વર્ગીકૃત કરવામાં આવ્યો છે, જે સૂચવે છે કે અમેરિકાના જોબ માર્કેટમાં આ એક મોટું પરિવર્તન લાવશે.

શું આ નિયમથી ભારતીય આઈટી સેક્ટરના ગ્રોથ પર બ્રેક લાગશે કે પછી કુશળ ભારતીયોને વધુ મોટું પેકેજ મળશે, તે હવે આવનારો સમય જ કહેશે.