જયપુર:રાજસ્થાનની ભજનલાલ સરકારે આજે મળેલી કેબિનેટ બેઠકમાં રાજ્યનો ચહેરો બદલી નાખનારા પાંચ મોટા નિર્ણયો લઈને પ્રજાને મોટી ભેટ આપી છે. સુશાસનના સંકલ્પ સાથે સરકારે પંચાયતી રાજથી લઈને ઉદ્યોગ અને શિક્ષણ ક્ષેત્રે ક્રાંતિકારી બદલાવની બ્લુપ્રિન્ટ રજૂ કરી છે.
૧. ચૂંટણીમાં ‘બે બાળકો’નો અવરોધ દૂર: રાજસ્થાનમાં છેલ્લા ૨૮ વર્ષથી અમલમાં રહેલો નિયમ હવે ઈતિહાસ બની જશે. સરકારે રાજસ્થાન પંચાયતી રાજ અને મ્યુનિસિપાલિટી સુધારા બિલ ૨૦૨૬ને મંજૂરી આપી છે. હવે જેમને બે કરતાં વધુ બાળકો છે તેઓ પણ સ્થાનિક સ્વરાજ્યની ચૂંટણી લડી શકશે. મંત્રી જોગારામ પટેલે જણાવ્યું કે, ૧૯૯૦ના દાયકામાં જ્યારે પ્રજનન દર ૩.૬ હતો ત્યારે આ નિયમ જરૂરી હતો, પણ હવે તે ૨ પર આવી ગયો હોવાથી આ પ્રતિબંધ હટાવી દેવાયો છે. વધુમાં, રક્તપિત્તના દર્દીઓ પરનો ચૂંટણી પ્રતિબંધ પણ દૂર કરી તેમને સન્માન અપાયું છે.
૨. આર્થિક ગુનેગારોની હવે ખેર નથી: રિયલ એસ્ટેટ છેતરપિંડી, નકલી પ્લેસમેન્ટ એજન્સીઓ અને સરકારી જમીનો પરના અતિક્રમણને રોકવા માટે સરકારે ‘મહેસૂલ ગુપ્તચર અને આર્થિક ગુના નિયામકમંડળ’ની સ્થાપના કરી છે. હવે તમામ આર્થિક ગુનાઓની તપાસ એક જ છત્ર હેઠળ થશે, જેનાથી ભ્રષ્ટાચાર પર અંકુશ આવશે.
૩. ઉદ્યોગો માટે ૪૦ કરોડ સુધીની સબસિડી: ઉદ્યોગ પ્રધાન રાજ્યવર્ધન રાઠોડે ‘રાજસ્થાન ઔદ્યોગિક ઉદ્યાન પ્રમોશન નીતિ ૨૦૨૬’ જાહેર કરી છે. આ નીતિ હેઠળ ૨૫૦ એકરથી મોટા ઔદ્યોગિક ઉદ્યાનો સ્થાપવા માટે સરકાર ૪૦ કરોડ રૂપિયા સુધીની મૂડી સબસિડી આપશે. નીમકાથાણામાં સ્ટીલ પ્લાન્ટ માટે જમીન ફાળવણીથી અંદાજે ૫૬૫ લોકોને સીધી નોકરીઓ મળશે.
૪. અજમેર બનશે આયુષ હબ: જોધપુર બાદ હવે અજમેરમાં પણ અત્યાધુનિક ‘રાજસ્થાન આયુર્વેદ, યોગ અને નેચરોપેથી યુનિવર્સિટી’ સ્થાપવામાં આવશે. આ નિર્ણયથી રાજસ્થાનમાં મેડિકલ ટુરિઝમને વેગ મળશે અને આયુષ પદ્ધતિ દ્વારા રોજગારીની નવી તકો ઉભી થશે.
૫. ગ્રામ વિકાસ અધિકારીઓને ‘પ્રમોશન’ની ભેટ: લાંબા સમયથી રાહ જોઈ રહેલા ગ્રામ વિકાસ અધિકારીઓ (VDO) માટે સરકારે ૭૫૦ જગ્યાઓને અપગ્રેડ કરીને ‘વરિષ્ઠ ગ્રામ વિકાસ અધિકારી’ની નવી કેડર બનાવી છે. આનાથી કર્મચારીઓને સીધું લેવલ-૬ થી લેવલ-૧૦ (ગ્રેડ પે ૩૬૦૦) માં પ્રમોશન મળશે, જે પંચાયતી રાજ વ્યવસ્થાને વધુ મજબૂત બનાવશે