જેરૂસલેમ: ભારતના પ્રધાનમંત્રી નરેન્દ્રભાઈ મોદીએ ઇઝરાયેલની સંસદ 'નેસેટ'ને સંબોધિત કરતા હમાસ દ્વારા કરવામાં આવેલા આતંકવાદી હુમલાની કડક શબ્દોમાં નિંદા કરી છે. પોતાના સંબોધનમાં નરેન્દ્રભાઈ મોદીએ સ્પષ્ટપણે જણાવ્યું હતું કે ભારત આ મુશ્કેલ સમયમાં ઇઝરાયેલની સાથે અડગ ઊભું છે. તેમણે આતંકવાદને માનવતા માટે સૌથી મોટું સંકટ ગણાવતા કહ્યું કે, ભારત પોતે દાયકાઓથી આતંકવાદનો ભોગ બન્યું છે, તેથી અમે તમારા દર્દને સારી રીતે સમજી શકીએ છીએ.

નરેન્દ્રભાઈ મોદીએ પોતાના વક્તવ્યની શરૂઆતમાં જ હમાસના કૃત્યને અમાનવીય ગણાવ્યું હતું. તેમણે કહ્યું કે નિર્દોષ નાગરિકો પર કરવામાં આવેલા હુમલા કોઈ પણ સંજોગોમાં સ્વીકારી શકાય નહીં. આતંકવાદ ગમે તે સ્વરૂપમાં હોય, તે વિશ્વની શાંતિ માટે જોખમ છે.

 ઇઝરાયેલમાં થયેલી હિંસાની ઘટનાઓથી ભારત વ્યથિત છે અને અમે માર્યા ગયેલા લોકોના પરિવારો પ્રત્યે સંવેદના વ્યક્ત કરીએ છીએ. આ લડાઈમાં ભારત ઇઝરાયેલના મનોબળને ટેકો આપે છે.

ઇઝરાયેલની સંસદના સભ્યોને સંબોધતા નરેન્દ્રભાઈ મોદીએ ભારત અને ઇઝરાયેલના સંબંધો પર ભાર મૂક્યો હતો. તેમણે જણાવ્યું કે ભારત અને ઇઝરાયેલ લોકશાહીના મૂલ્યોથી જોડાયેલા દેશો છે. જ્યારે લોકશાહી અને શાંતિ પર પ્રહાર થાય છે, ત્યારે ભારતે હંમેશા ન્યાયના પક્ષમાં અવાજ ઉઠાવ્યો છે. તેમણે ૨૬/૧૧ના મુંબઈ આતંકવાદી હુમલાને યાદ કરતા જણાવ્યું હતું કે ભારતે પણ આતંકવાદનું ક્રૂર સ્વરૂપ જોયું છે, અને તેથી જ આતંકવાદ સામેની લડાઈમાં અમારી શૂન્ય સહિષ્ણુતાની નીતિ છે.

નરેન્દ્રભાઈ મોદીએ વધુમાં ઉમેર્યું કે આધુનિક યુગમાં આતંકવાદને કોઈ સીમાડા નથી હોતા, તે વૈશ્વિક જોખમ છે જેનો સામનો કરવા માટે તમામ લોકશાહી દેશોએ એક થવું પડશે. તેમણે ઇઝરાયેલની ટેકનોલોજી અને હિંમતની પ્રશંસા કરતા કહ્યું કે ઇઝરાયેલની પ્રજાએ વારંવાર સાબિત કર્યું છે કે તેઓ પડકારો સામે હાર માનતા નથી. ભારતના લોકો ઇઝરાયેલના લોકોના સાહસને સલામ કરે છે.

આ સંબોધન દરમિયાન નરેન્દ્રભાઈ મોદીએ બંધકોની મુક્તિ માટે પણ ચિંતા વ્યક્ત કરી હતી. તેમણે કહ્યું કે માનવીય દ્રષ્ટિકોણથી તમામ બંધકોને તાત્કાલિક મુક્ત કરવા જોઈએ. શાંતિ જાળવવા માટે આતંકવાદી સંગઠનો પર આંતરરાષ્ટ્રીય દબાણ લાવવું જરૂરી છે. ભારત વૈશ્વિક મંચ પર આતંકવાદ વિરુદ્ધ કાયદાઓને વધુ મજબૂત કરવા માટે સતત પ્રયત્નશીલ છે અને ઇઝરાયેલ આ દિશામાં ભારતનું મહત્વનું ભાગીદાર છે.

સંબોધનના અંતે નરેન્દ્રભાઈ મોદીએ ઇઝરાયેલ અને ભારતની મિત્રતા અમર રહે તેવા ભાવ સાથે વિરામ લીધો હતો.

આ સંબોધન બાદ નેસેટના સભ્યોએ ઊભા થઈને ભારતના પ્રધાનમંત્રીના શબ્દોને આવકાર્યા હતા. આ મુલાકાત અને સંબોધનથી ભારત અને ઇઝરાયેલ વચ્ચેના વ્યૂહાત્મક સંબંધો વધુ મજબૂત બન્યા છે અને વિશ્વને આતંકવાદ સામે એકતાનો મજબૂત સંદેશ મળ્યો છે.