ક્યુબાના કોસ્ટ ગાર્ડે ફ્લોરિડામાં નોંધાયેલી એક અમેરિકી સ્પીડબોટ પર ગોળીબાર કરતા ૪ લોકોના મોત થયા છે અને અન્ય ૬ લોકો ઘાયલ થયા છે. આ ઘટના ક્યુબાના વિલા ક્લારા પ્રાંતમાં ફાલ્કોન્સ કેયથી એક નોટિકલ માઈલ દૂર બની હતી. 

ક્યુબાના ગૃહ મંત્રાલય દ્વારા પ્રાપ્ત સત્તાવાર વિગતો અનુસાર, એક ગેરકાયદેસર સ્પીડબોટ ક્યુબાની જળસીમામાં ઘૂસી આવી હતી. જ્યારે ક્યુબાના કોસ્ટ ગાર્ડના જવાનો પૂછપરછ માટે નજીક ગયા, ત્યારે બોટમાંથી તેમના પર ફાયરિંગ કરવામાં આવ્યું હતું. આ ફાયરિંગમાં ક્યુબાના જહાજના કમાન્ડર પણ ઘાયલ થયા હતા. ત્યારબાદ થયેલી સામસામી અથડામણમાં વિદેશી બોટમાં સવાર ચાર હુમલાખોરો માર્યા ગયા હતા અને અન્ય છ ઘાયલ થયા હતા. 

ઘાયલોને તાત્કાલિક તબીબી સારવાર આપવામાં આવી રહી છે. ક્યુબા અને અમેરિકા વચ્ચે ચાલી રહેલા રાજકીય તણાવ વચ્ચે આ ઘટનાએ દરિયાઈ સુરક્ષા અંગે નવી ચિંતાઓ ઊભી કરી છે. ફ્લોરિડાના એટર્ની જનરલે પણ આ આંતરરાષ્ટ્રીય ઘટનાની તપાસના આદેશ આપ્યા છે. *