રાંચી, તા. ૨૬: ઝારખંડની રાજધાની રાંચીમાં પોલીસે એક એવા ડ્રગ નેટવર્કનો પર્દાફાશ કર્યો છે જેના તાર સીધા યુરોપ સાથે જોડાયેલા છે. રાંચી પોલીસની સતર્કતાને કારણે લાખો રૂપિયાની કિંમતનું ઘાતક 'LSD' ડ્રગ્સ પકડાયું છે. આ સમગ્ર કૌભાંડમાં સૌથી ચોંકાવનારી વાત એ છે કે પકડાયેલો મુખ્ય આરોપી એક પ્રતિષ્ઠિત વકીલનો પુત્ર છે. તે વિદેશથી પાર્સલ દ્વારા ડ્રગ્સ મંગાવીને શહેરની નામચીન કોલેજો અને હાઈ-પ્રોફાઈલ પાર્ટીઓમાં સપ્લાય કરવાની પેરવીમાં હતો.

પોલીસને બાતમી મળી હતી કે રાંચીમાં વિદેશી કુરિયર મારફતે પ્રતિબંધિત માદક દ્રવ્યો ઘુસાડવામાં આવી રહ્યા છે. આ માહિતીના આધારે પોલીસે વ્યૂહાત્મક રીતે કામગીરી હાથ ધરી અને યુરોપથી આવતા શંકાસ્પદ પાર્સલ પર સતત એક મહિના સુધી બાજ નજર રાખી હતી. જેવું આ પાર્સલ રાંચી પહોંચ્યું અને પેલો યુવક તેને લેવા આવ્યો, કે તરત જ પોલીસે ફિલ્મી ઢબે તરાપ મારીને તેની રંગેહાથ ધરપકડ કરી લીધી હતી.

પ્રાથમિક પૂછપરછમાં બહાર આવ્યું છે કે, આરોપી યુવક અગાઉ મુંબઈ અને હિમાચલ પ્રદેશ જેવા સ્થળોએથી નશાનો સામાન મંગાવતો હતો, પરંતુ આ વખતે તેણે સીધો યુરોપથી LSD મંગાવવાનું સાહસ કર્યું હતું. પોલીસ તપાસ કરી રહી છે કે શું તે ડાર્ક વેબનો ઉપયોગ કરતો હતો અને આ નેટવર્કમાં શહેરના અન્ય કેટલા મોટા માથાઓ સામેલ છે.

શહેરની યુવા પેઢીને નશાના રવાડે ચઢાવવાના આ આંતરરાષ્ટ્રીય કાવતરાને નિષ્ફળ બનાવીને રાંચી પોલીસે મોટી સફળતા મેળવી છે. હાલમાં આ ડ્રગ્સની ચોક્કસ કિંમત અને તેની પાછળ રહેલા અન્ય સપ્લાયરોની શોધખોળ તેજ કરી દેવામાં આવી છે. કોલેજ કેમ્પસ અને હાઈ-સોસાયટીની પાર્ટીઓમાં ડ્રગ્સના વધતા દૂષણે વાલીઓ અને પોલીસ તંત્ર માટે ચિંતાનો વિષય બનાવી દીધો છે.