ટોક્યો:  ઉત્તર પ્રદેશના મુખ્યમંત્રી યોગી આદિત્યનાથે જાપાન પ્રવાસ દરમિયાન પરિવહનની દુનિયાના અજાયબી સમાન 'એસસી મેગ્લેવ' ટ્રેનમાં સવારી કરીને સૌનું ધ્યાન ખેંચ્યું છે. જાપાનના યામાનાશી ટેસ્ટ સેન્ટર ખાતે સીએમ યોગીએ જ્યારે આ હાઇ-ટેક ટ્રેનમાં પગ મૂક્યો, ત્યારે થોડી જ ક્ષણોમાં ટ્રેને ૫૦૧ કિમી/કલાકની સુપરસોનિક ઝડપ પકડી લીધી હતી. આ આધુનિક ટ્રેન કોઈ સામાન્ય પાટા પર નથી દોડતી, પરંતુ સુપરકન્ડક્ટિંગ મેગ્નેટના જોરે પાટાથી થોડી ઊંચી હવામાં તરે છે. આ આશ્ચર્યજનક સવારીનો વીડિયો અને ફોટા સોશિયલ મીડિયા પર વાયરલ થતા જ લોકો ભારતમાં પણ આવી ટેકનોલોજીના આગમનની આશા સેવી રહ્યા છે.

મુખ્યમંત્રીએ આ અનુભવને અત્યંત ગૌરવશાળી ગણાવતા સોશિયલ મીડિયા પર શેર કર્યું કે, ૫૦૦ કિમીથી વધુની ઝડપ હોવા છતાં ટ્રેનની અંદર જરાય ધ્રુજારી કે અવાજ અનુભવાયો નહોતો. તેમણે જાપાનની એન્જિનિયરિંગ ક્ષમતાના વખાણ કરતા જણાવ્યું કે, જ્યારે ટેકનોલોજી આટલી ઊંચાઈએ પહોંચે છે ત્યારે ભવિષ્યની કલ્પના સાકાર થતી જણાય છે. આ ટ્રેને અગાઉ ૬૦૩ કિમી/કલાકની ઝડપનો વિશ્વ રેકોર્ડ પણ નોંધાવ્યો છે. યોગી આદિત્યનાથની આ મુલાકાત માત્ર એક સવારી નથી, પરંતુ ઉત્તર પ્રદેશ અને ભારતમાં પરિવહન વ્યવસ્થાને વૈશ્વિક સ્તરે લઈ જવા માટેના આત્મવિશ્વાસનું પ્રતીક બની રહી છે.

સીએમ યોગીની આ ટેસ્ટ રાઇડ બાદ હવે ભારત-જાપાન વચ્ચેના હાઇ-સ્પીડ રેલ પ્રોજેક્ટ્સમાં વધુ ગતિ આવવાની શક્યતા છે. ભારતમાં પહેલાથી જ બુલેટ ટ્રેનનું કામ ચાલી રહ્યું છે, ત્યારે જાપાનની આ આગામી પેઢીની મેગ્લેવ સિસ્ટમ આવનારા સમયમાં ભારતીય રેલ્વેના કાયાકલ્પ માટે બ્લુપ્રિન્ટ સાબિત થઈ શકે છે. સીએમ યોગીએ આ મુલાકાત દ્વારા ઇન્ફ્રાસ્ટ્રક્ચર અને ટેકનોલોજીના ક્ષેત્રમાં વિદેશી રોકાણને આકર્ષવા માટે પણ મહત્વપૂર્ણ મંત્રણા કરી છે. યામાનાશીના આ પ્રવાસથી સાબિત થયું છે કે 'નવા ઉત્તર પ્રદેશ'ના નિર્માણ માટે યોગી સરકાર વૈશ્વિક સ્તરની અત્યાધુનિક સુવિધાઓનો અભ્યાસ કરી રહી છે.