મુંબઈ: મહારાષ્ટ્રના રાજકારણમાં 'ફાયરબ્રાન્ડ' નેતા ગણાતા સંજય રાઉત માટે આજે ન્યાયતંત્રમાંથી ખૂબ જ રાહતના સમાચાર આવ્યા છે. ભાજપના પૂર્વ સાંસદ કિરીટ સોમૈયાના પત્ની મેધા સોમૈયા દ્વારા દાખલ કરવામાં આવેલા ૧૦૦ કરોડના કૌભાંડના માનહાનિ કેસમાં મુંબઈની સેશન્સ કોર્ટે સંજય રાઉતને નિર્દોષ જાહેર કર્યા છે. આ સાથે જ નીચલી કોર્ટે ફટકારેલી ૧૫ દિવસની જેલની સજા અને દંડના આદેશને પણ કોર્ટે ઉલટાવી દીધો છે.
 આ વિવાદ વર્ષ ૨૦૨૨માં શરૂ થયો હતો, જ્યારે સંજય રાઉતે મીરા-ભાયંદર શહેરમાં ૧૫૪ જાહેર શૌચાલયોના નિર્માણમાં ૧૦૦ કરોડ રૂપિયાની ગેરરીતિ થઈ હોવાનો ગંભીર આરોપ લગાવ્યો હતો. તેમણે આ કૌભાંડમાં કિરીટ સોમૈયા અને તેમના પત્ની મેધા સોમૈયા સંડોવાયેલા હોવાનું જણાવ્યું હતું. આ આરોપોથી વ્યથિત થઈને પ્રોફેસર મેધા સોમૈયાએ રાઉત વિરુદ્ધ માનહાનિનો દાવો માંડ્યો હતો. સપ્ટેમ્બર ૨૦૨૪માં મઝગાંવ કોર્ટે રાઉતને દોષિત ઠેરવી જેલની સજા સંભળાવી હતી, જેને હવે સેશન્સ કોર્ટે રદ કરી દીધી છે.
કોર્ટના ચુકાદા બાદ સંજય રાઉતે પ્રતિક્રિયા આપતા કહ્યું કે, "આ ન્યાયની જીત છે. મેં હંમેશા દસ્તાવેજોના આધારે પ્રશ્નો ઉઠાવ્યા હતા. જ્યારે ન્યાય મળે છે ત્યારે સામાન્ય માણસનો ન્યાયતંત્ર પરનો વિશ્વાસ વધુ મજબૂત બને છે." બીજી તરફ, ભાજપ નેતા કિરીટ સોમૈયા હજુ પણ પીછેહઠ કરવાના મૂડમાં નથી. તેમણે સ્પષ્ટ કર્યું છે કે તેઓ આ નિર્ણયને હાઈકોર્ટમાં પડકારશે.
આ કેસ માત્ર બે નેતાઓ વચ્ચેની કાનૂની લડાઈ નથી, પરંતુ મહારાષ્ટ્રની સત્તાવાર ખેંચતાણનું પ્રતિબિંબ પણ છે. હાલ પૂરતું તો સંજય રાઉતે જેલ જવામાંથી મુક્તિ મેળવીને રાજકીય મોરચે મોટી સફળતા મેળવી છે. હવે જોવાનું એ રહેશે કે હાઈકોર્ટમાં આ કાનૂની જંગ કયું નવું વળાંક લે છે.