યરુશલમ:વડાપ્રધાન નરેન્દ્રભાઈ મોદી હાલમાં ઇઝરાયલની બે દિવસીય સત્તાવાર મુલાકાતે છે. આ મુલાકાત માત્ર રાજદ્વારી સંબંધો પૂરતી મર્યાદિત નથી, પરંતુ તે બે એવી સંસ્કૃતિઓનું મિલન છે જે ભવિષ્યની ટેકનોલોજી પર સાથે મળીને કામ કરવા માંગે છે. ઇઝરાયલ એક એવો દેશ છે જેણે પોતાની ભૌગોલિક મર્યાદાઓને જ પોતાની સૌથી મોટી તાકાત બનાવી દીધી છે. પીએમ મોદીની આ મુલાકાત દરમિયાન ઇઝરાયલે વિશ્વને આપેલી અમૂલ્ય ભેટો પર ફરી એકવાર દુનિયાની નજર મંડાઈ છે.
આયર્ન ડોમ: જ્યારે પણ ઇઝરાયલ પર દુશ્મન દેશો દ્વારા રોકેટ કે મિસાઇલ હુમલા થાય છે, ત્યારે ઇઝરાયલનું 'આયર્ન ડોમ' સક્રિય થઈ જાય છે. આ દુનિયાની સૌથી અદ્યતન એન્ટિ-મિસાઇલ સિસ્ટમ છે. તે હવામાં જ દુશ્મન મિસાઇલને ટ્રેક કરે છે અને તે જનવસ્તી પર પડે તે પહેલા જ તેનો નાશ કરે છે. ભારત જેવા દેશ માટે, જે સતત સરહદી પડકારોનો સામનો કરે છે, ઇઝરાયલની આ સંરક્ષણ ટેકનોલોજી એક સુરક્ષા કવચ સમાન છે.
ઇઝરાયલ મૂળભૂત રીતે રણ પ્રદેશ છે, જ્યાં પાણીનું ટીપે-ટીપું કિંમતી છે. અહીંથી જ જન્મી 'ટપક સિંચાઈ' ટેકનોલોજી, જે આજે ગુજરાતના અને ભારતના લાખો ખેડૂતોના ખેતરમાં હરિયાળી લાવી રહી છે. આ ઉપરાંત, ઇઝરાયલે દરિયાના ખારા પાણીને પીવાલાયક બનાવવાની 'ડિસેલિનેશન' ટેકનોલોજીમાં પણ મહારત હાંસલ કરી છે. પીએમ મોદીની મુલાકાતનો મુખ્ય ઉદ્દેશ્ય ભારતની જળ સમસ્યાના ઉકેલ માટે આ ટેકનોલોજીનો વધુમાં વધુ ઉપયોગ કરવાનો છે.
 ઇઝરાયલને આજે વિશ્વ 'સ્ટાર્ટ-અપ નેશન' તરીકે ઓળખે છે. સાયબર સુરક્ષા હોય કે મેડિકલ ટેકનોલોજી, ઇઝરાયલી સ્ટાર્ટ-અપ્સ આખી દુનિયામાં ધૂમ મચાવી રહ્યા છે. પીએમ મોદીએ ઇઝરાયલી સંસદ 'નેસેટ'ને સંબોધતા પણ આ બાબત પર ભાર મૂક્યો હતો કે ભારતનું IT કૌશલ્ય અને ઇઝરાયલની નવીનતા સાથે મળીને વિશ્વની ઘણી સમસ્યાઓ ઉકેલી શકે છે.
પીએમ મોદીની આ મુલાકાત માત્ર સંરક્ષણ સોદાઓ પૂરતી નથી, પણ તે કૃષિ, પાણી વ્યવસ્થાપન અને સાયબર સુરક્ષા ક્ષેત્રે ભારતને આત્મનિર્ભર બનાવવાની દિશામાં એક મોટું ડગલું છે. ઇઝરાયલ પાસેથી ભારત જે શીખી રહ્યું છે, તે આવનારા વર્ષોમાં દેશની અર્થવ્યવસ્થા અને સુરક્ષામાં મોટો બદલાવ લાવશે