મુંબઈ:  સપ્તાહના અંતિમ ટ્રેડિંગ દિવસે ભારતીય શેરબજારમાં જાણે કુદરતી આફત આવી હોય તેમ રોકાણકારોના માથે આભ ફાટ્યું છે. ઇન્ટ્રાડે ટ્રેડિંગ દરમિયાન સેન્સેક્સમાં 1000 પોઈન્ટથી વધુનો ગાબડું પડતા બજારમાં ભારે ગભરાટ ફેલાયો હતો. દિવસના અંતે સેન્સેક્સ 961 પોઈન્ટ તૂટીને 81,287 પર સ્થિર થયો, જ્યારે નિફ્ટી પણ 300થી વધુ પોઈન્ટના ઘટાડા સાથે 25,178 પર બંધ રહ્યો. આ અણધાર્યા ઘટાડાને કારણે માત્ર થોડા જ કલાકોમાં BSE પર લિસ્ટેડ કંપનીઓનું માર્કેટ કેપિટલાઈઝેશન ₹5 લાખ કરોડ ઘટી ગયું છે, જેનો સીધો ફટકો સામાન્ય રોકાણકારોના ખિસ્સા પર પડ્યો છે. બજારના 30 મુખ્ય શેરોમાંથી 25 શેરો લાલ નિશાનમાં બંધ થતા ચારેબાજુ વેચવાલીનું મોજું ફરી વળ્યું હતું.

આ આર્થિક ભૂકંપ પાછળનું મુખ્ય કારણ સીમા પાર ફેલાયેલો ભૂ-રાજકીય તણાવ હોવાનું મનાય છે. અમેરિકા અને ઈરાન વચ્ચેની વાટાઘાટો નિષ્ફળ રહેતા અને બંને પક્ષો યુદ્ધ જેવી સ્થિતિમાં હોવાના સંકેતો મળતા વૈશ્વિક બજારોમાં નબળાઈ જોવા મળી છે. વધુમાં, અફઘાનિસ્તાન અને પાકિસ્તાન વચ્ચેના સંઘર્ષની અસર પણ એશિયન બજારો પર પડી છે, જેની સીધી અસર દલાલ સ્ટ્રીટ પર વર્તાઈ છે. વિદેશી સંસ્થાકીય રોકાણકારો (FII) એ પણ એક જ દિવસમાં આશરે ₹3,465 કરોડના શેર વેચી નાખતા ભારતીય બજારમાં લિક્વિડિટીનું સંકટ ઊભું થયું છે. સન ફાર્મા, મહિન્દ્રા એન્ડ મહિન્દ્રા અને ભારતી એરટેલ જેવા મજબૂત ગણાતા શેરો પણ આજે પત્તાના મહેલની જેમ ધરાશાયી થયા હતા.

બજારના આંકડાઓ પર નજર કરીએ તો, બીએસઈ પર ટ્રેડિંગ થતા 4,369 શેરોમાંથી 2,528 શેરોમાં ગાબડા પડ્યા છે, જ્યારે 340 જેટલા શેરો તેમના 52 અઠવાડિયાના સૌથી નીચલા સ્તરે પહોંચી ગયા છે. ટેકનોલોજી સેક્ટરમાં પણ NASDAQ ની નબળાઈને પગલે ભારે વેચવાલી જોવા મળી હતી. રોકાણકારો હવે સોમવારે બજાર ખુલશે ત્યારે ફરી રિકવરી આવશે કે ઘટાડો ચાલુ રહેશે તેને લઈને ચિંતામાં છે. નિષ્ણાતોના મતે, જ્યાં સુધી વૈશ્વિક સ્તરે યુદ્ધના વાદળો વિખેરાશે નહીં અને વિદેશી રોકાણકારો વેચાણ અટકાવશે નહીં, ત્યાં સુધી બજારમાં વોલેટિલિટી જળવાઈ રહી શકે છે.