મધુબની:  ભારત અને નેપાળ વચ્ચેના સંબંધોમાં સુરક્ષા અને લોકશાહીના ઉત્સવને પ્રાધાન્ય આપતા એક મોટા સમાચાર સામે આવ્યા છે. નેપાળમાં આગામી ૫ માર્ચ, ૨૦૨૬ના રોજ યોજાનારી ચૂંટણીને શાંતિપૂર્ણ રીતે સંપન્ન કરાવવા માટે બંને દેશોની સરહદો ત્રણ દિવસ માટે સંપૂર્ણપણે સીલ કરવાનો નિર્ણય લેવામાં આવ્યો છે. મંગળવાર, ૩ માર્ચથી ગુરુવાર, ૫ માર્ચ સુધી ભારત-નેપાળ સરહદ પર લોખંડી બંદોબસ્ત રહેશે. આ દરમિયાન માત્ર પરિવહન જ નહીં, પરંતુ તમામ વ્યાપારી ગતિવિધિઓ અને આયાત-નિકાસના કામો પણ અસ્થાયી રૂપે થંભી જશે, જેના કારણે સરહદી જિલ્લાઓમાં ચુસ્ત પોલીસ પહેરો ગોઠવી દેવામાં આવ્યો છે.

સૌથી મોટી અસર ભારત અને નેપાળને જોડતી જીવનરેખા સમાન રેલ સેવા પર પડવાની છે. નેપાળ રેલ્વેની સત્તાવાર જાહેરાત મુજબ, જયનગર અને જનકપુર વચ્ચે દોડતી તમામ ટ્રેનો આ ત્રણ દિવસ દરમિયાન પાટા પરથી ઉતરી જશે એટલે કે બંધ રહેશે. રેલવે જ નહીં, પણ બિહારના સરહદી જિલ્લાઓમાંથી નેપાળ જતી બસો અને ખાનગી વાહનો પર પણ બ્રેક લાગી ગઈ છે. વહીવટીતંત્રે સ્પષ્ટ કર્યું છે કે પ્રવાસી મુસાફરી કે સામાન્ય મુલાકાતો માટે આ દિવસોમાં બોર્ડર ક્રોસ કરવી અશક્ય હશે. જો કોઈને લગ્ન કે અન્ય સામાજિક પ્રસંગો હોય, તો તેમણે ૨ માર્ચ પહેલા અથવા ૬ માર્ચ પછી જ મુસાફરીનું આયોજન કરવા માટે કડક સૂચના આપવામાં આવી છે.

જોકે, માનવીય અભિગમ અપનાવતા કટોકટીના કિસ્સાઓ માટે ખાસ જોગવાઈ રાખવામાં આવી છે. જો કોઈ વ્યક્તિને અત્યંત ગંભીર કારણોસર નેપાળ જવું અનિવાર્ય હોય, તો તેમણે માન્ય ઓળખપત્ર, વાહનના દસ્તાવેજો અને વહીવટીતંત્રની ખાસ પરમિટ સાથે રાખવી પડશે. આ કિસ્સામાં પણ કસ્ટમ પ્રક્રિયા પૂર્ણ કર્યા બાદ જ પ્રવેશ મળશે અને તે જ દિવસે સાંજ પહેલા પરત ફરવાની શરત રાખવામાં આવી છે. ચૂંટણીના આ માહોલમાં કોઈપણ પ્રકારની અનિચ્છનીય ઘટનાને રોકવા માટે બંને દેશોના અધિકારીઓ સતત સંપર્કમાં છે. ૬ માર્ચથી સ્થિતિ ફરી સામાન્ય થશે અને વ્યવહાર રાબેતા મુજબ શરૂ થઈ જશે.