મુંબઈ:  ભારતીય અર્થતંત્ર માટે આંતરરાષ્ટ્રીય સ્તરેથી એક ખૂબ જ પ્રોત્સાહક સમાચાર સામે આવ્યા છે. રિઝર્વ બેંક ઓફ ઈન્ડિયા દ્વારા જાહેર કરવામાં આવેલા તાજેતરના આંકડા મુજબ, 20 ફેબ્રુઆરી, 2026 ના રોજ પૂરા થયેલા સપ્તાહમાં ભારતનો કુલ વિદેશી હૂંડિયામણ ભંડાર 725.727 બિલિયન ડોલરની નવી સર્વોચ્ચ સપાટીએ પહોંચી ગયો છે. આ સપ્તાહ દરમિયાન ભંડારમાં 2.119 બિલિયન ડોલરનો નોંધપાત્ર વધારો થયો છે. આ ઉછાળો માત્ર આંકડાકીય નથી, પરંતુ તે દર્શાવે છે કે વૈશ્વિક બજારમાં રૂપિયાની સ્થિતિ મજબૂત થઈ રહી છે અને ભારત કોઈપણ બાહ્ય આર્થિક આંચકા સામે લડવા માટે વધુ સક્ષમ બન્યું છે.

વિદેશી હૂંડિયામણ ભંડારમાં થયેલા આ વધારામાં સૌથી મોટો ફાળો 'ફોરેન કરન્સી એસેટ્સ' (FCA) નો રહ્યો છે. ડેટા અનુસાર, વિદેશી ચલણની અસ્કયામતો 1.039 બિલિયન ડોલર  વધીને 572.564 બિલિયન ડોલર  પર પહોંચી છે. મહત્વની વાત એ છે કે, આ ભંડારમાં માત્ર અમેરિકન ડોલર જ નહીં પરંતુ યુરો, પાઉન્ડ અને યેન જેવી બિન-યુએસ કરન્સીની વધઘટની અસર પણ સામેલ હોય છે. આ ભંડાર જેટલો મજબૂત, તેટલો જ આયાત-નિકાસ અને વિદેશી દેવાની ચૂકવણીમાં ભારતનો હાથ ઉપર રહે છે, જે રોકાણકારો માટે વિશ્વાસનું પ્રતીક છે.

માત્ર રોકડ જ નહીં, પણ ભારતના સોનાના ભંડાર માં પણ ચમક જોવા મળી છે. સમીક્ષા હેઠળના સપ્તાહ દરમિયાન સોનાના અનામતનું મૂલ્ય 977 મિલિયન ડોલર વધીને 127.489 બિલિયન ડોલર  થઈ ગયું છે. બીજી તરફ, સ્પેશિયલ ડ્રોઇંગ રાઇટ્સ 18.84 બિલિયન ડોલર  પર પહોંચ્યા છે. જોકે, આંતરરાષ્ટ્રીય નાણાકીય ભંડોળ પાસે ભારતની અનામત સ્થિતિમાં 18 મિલિયન ડોલરનો મામૂલી ઘટાડો જોવા મળ્યો છે. એકંદરે, સોના અને વિદેશી ચલણના આ મજબૂત સંગ્રહથી ભારત હવે વિશ્વની સૌથી શક્તિશાળી આર્થિક સત્તાઓ સાથે ખભેખભા મિલાવીને ઊભું છે.