લખનૌ: ઉત્તર પ્રદેશને 'ઉત્તમ પ્રદેશ' બનાવવાની દિશામાં મુખ્યમંત્રી યોગી આદિત્યનાથે વધુ એક ઐતિહાસિક સિદ્ધિ હાંસલ કરી છે. સિંગાપોર અને જાપાનની ચાર દિવસીય સફળ મુલાકાત પૂર્ણ કરી શુક્રવારે સવારે જ્યારે સીએમ યોગી લખનૌ એરપોર્ટ પર ઉતર્યા, ત્યારે તેમની સાથે યુપીના વિકાસ માટે ₹4 લાખ કરોડથી વધુના રોકાણ પ્રસ્તાવોનું મોટું પોટલું હતું. સેંકડો દિગ્ગજ ઉદ્યોગપતિઓ અને આંતરરાષ્ટ્રીય રોકાણકારો સાથેની ડઝનબંધ બેઠકો બાદ, ₹1.5 લાખ કરોડના એમઓયુ (MoU) પર સ્થળ પર જ હસ્તાક્ષર કરવામાં આવ્યા છે. મુખ્યમંત્રીએ આ વિદેશ પ્રવાસને રાજ્યના ઔદ્યોગિક ભવિષ્ય માટે એક 'નવી સવાર' ગણાવી છે, જે યુપીને વન ટ્રિલિયન ઇકોનોમી તરફ ઝડપથી દોરી જશે.

આ મુલાકાત દરમિયાન માત્ર પરંપરાગત ઉદ્યોગો જ નહીં, પરંતુ ભવિષ્યની ટેકનોલોજી પર વધુ ભાર મૂકવામાં આવ્યો હતો. જાપાન અને સિંગાપોરની ટેક-કંપનીઓએ યુપીમાં ગ્રીન હાઇડ્રોજન, સેમિકન્ડક્ટર અને ડેટા સેન્ટર્સ સ્થાપવા માટે અભૂતપૂર્વ ઉત્સાહ દાખવ્યો છે. લોજિસ્ટિક્સ અને ડિફેન્સ મેન્યુફેક્ચરિંગ જેવા ક્ષેત્રોમાં થયેલા આ કરારોથી રાજ્યનું ઔદ્યોગિક માળખું સંપૂર્ણપણે બદલાઈ જશે. સરકારનો દાવો છે કે આ રોકાણોથી આગામી સમયમાં અંદાજે 5 લાખ જેટલા સીધા અને પરોક્ષ રોજગારની તકો ઉભી થશે. ખાસ કરીને પૂર્વાંચલ અને બુંદેલખંડ જેવા વિસ્તારોમાં આ મોટા પ્રોજેક્ટ્સ આવવાથી સ્થાનિક સ્તરે આર્થિક ક્રાંતિ સર્જાશે.

હવે મુખ્યમંત્રીનો તમામ ભાર આ રોકાણોને વહેલી તકે ધરાતલ પર ઉતારવા પર છે. જાહેરાતોને વાસ્તવિકતામાં બદલવા માટે જમીન ફાળવણી અને ક્લિયરન્સ પ્રક્રિયાને સિંગલ વિન્ડો સિસ્ટમ દ્વારા ઝડપી બનાવવાની સૂચના આપી દેવામાં આવી છે. નિષ્ણાતો માને છે કે જો આ પ્રોજેક્ટ્સ સમયસર શરૂ થશે, તો યુપીના એમએસએમઈ  ક્ષેત્ર અને સ્ટાર્ટઅપ્સને પણ નવી ઊંચાઈ મળશે. રોકાણકારોએ ઉત્તર પ્રદેશની સુધરેલી કાયદો અને વ્યવસ્થા અને વિશાળ બજાર ક્ષમતાની પ્રશંસા કરી છે, જે દર્શાવે છે કે હવે વૈશ્વિક સ્તરે યુપીની નવી ઓળખ એક 'ઈન્વેસ્ટમેન્ટ હબ' તરીકે પ્રસ્થાપિત થઈ ચૂકી છે.