મુંબઈ : સેન્ટ્રલ બ્યુરો ઓફ ઇન્વેસ્ટિગેશન (CBI) એ એક મોટી સફળતા મેળવતા ત્રણ દાયકાથી ફરાર જાહેર કરાયેલા ગુનેગાર અનંત તાંબેડકરની ધરપકડ કરી છે. ૧૯૯૨માં થયેલા બેંક છેતરપિંડીના કેસમાં સંડોવાયેલો આ આરોપી ધરપકડથી બચવા માટે છેલ્લા ૩૦ વર્ષથી સતત પોતાના ઠેકાણા બદલી રહ્યો હતો. જોકે, સીબીઆઈની ટીમે ટેકનિકલ ઇન્ટેલિજન્સ અને ફિલ્ડ વેરિફિકેશનના આધારે મુંબઈમાં તેનું ચોક્કસ લોકેશન શોધી કાઢ્યું અને ગુરુવારે તેને દબોચી લીધો હતો.

શું હતો ૧૯૯૨નો એ છેતરપિંડી કેસ?

આ સમગ્ર મામલો સ્ટેટ બેંક ઓફ બિકાનેર એન્ડ જયપુર (SBBJ) સાથે જોડાયેલો છે. ૧૯૯૨માં બેંકના નાણાકીય વ્યવહારોમાં મોટાપાયે ગેરરીતિ અને છેતરપિંડી થઈ હોવાનું બહાર આવ્યું હતું. સીબીઆઈની તપાસમાં ખુલાસો થયો હતો કે અનંત તાંબેડકર અને અન્ય આરોપીઓએ મળીને નકલી દસ્તાવેજો અને બનાવટી વ્યવહારો દ્વારા બેંકને મોટું આર્થિક નુકસાન પહોંચાડ્યું હતું. આ કેસમાં સીબીઆઈએ ૧૯૯૬માં ચાર્જશીટ દાખલ કરી હતી.

૯ આરોપીઓને સજા, પણ તાંબેડકર હતો ફરાર

આ કેસની ટ્રાયલ દરમિયાન અદાલતે અગાઉ ૯ આરોપીઓને દોષિત ઠેરવી સજા ફટકારી હતી. પરંતુ અનંત તાંબેડકર ચાર્જશીટ દાખલ થયા બાદ જ ગાયબ થઈ ગયો હતો. કોર્ટે તેને 'જાહેર કરાયેલા ગુનેગાર' (Proclaimed Offender) જાહેર કર્યો હતો અને તેની ટ્રાયલ અન્ય આરોપીઓથી અલગ કરી દીધી હતી. ૩૦ વર્ષ સુધી તે પોલીસ અને સીબીઆઈની નજરથી બચવામાં સફળ રહ્યો હતો.

સીબીઆઈની સ્પેશિયલ ટીમની કામગીરી

કલ્પેશ મહમુંકરના અહેવાલ મુજબ, સીબીઆઈના અધિકારીએ જણાવ્યું કે, "આરોપી લાંબા સમયથી ફરાર હતો, પરંતુ ટેકનિકલ ગુપ્ત માહિતીના આધારે અમે તેના સુધી પહોંચવામાં સફળ રહ્યા છીએ." ધરપકડ બાદ તાંબેડકરને કોર્ટમાં રજૂ કરવામાં આવ્યો હતો, જ્યાંથી તેને ન્યાયિક કસ્ટડીમાં મોકલી દેવામાં આવ્યો છે.

આ ધરપકડ એ વાતની સાબિતી છે કે ગુનો ગમે તેટલો જૂનો હોય, કાયદો ક્યારેય અપરાધીનો પીછો છોડતો નથી. સીબીઆઈની આ કામગીરીથી ૧૯૯૨ના જૂના બેંક કૌભાંડની ફાઈલ ફરી એકવાર ચર્ચામાં આવી છે.