સોનીપત: હરિયાણાના સોનીપતમાં "પહલ ન્યુટ્રિશન" નામની દુકાન પર ધોળા દિવસે થયેલા અંધાધૂંધ ગોળીબારે સમગ્ર વિસ્તારને હચમચાવી દીધો છે. આ હુમલા બાદ લોરેન્સ બિશ્નોઈ ગેંગના શૂટરોએ સોશિયલ મીડિયા પર હથિયારો પ્રદર્શિત કરતો એક વીડિયો પોસ્ટ કરીને ઘટનાની જવાબદારી સ્વીકારી છે. આ વીડિયોમાં ગુનેગારોએ માત્ર હુમલાની કબૂલાત જ નથી કરી, પરંતુ વિરોધી ગેંગસ્ટર અને તેના સમર્થકોને સીધી મોતની ધમકી આપી છે.
રણદીપ મલિક અને અનિલ પંડિત નામના શખ્સોએ સોશિયલ મીડિયા પર પોસ્ટ મૂકી દાવો કર્યો છે કે લોરેન્સ બિશ્નોઈ તેમનો મોટો ભાઈ છે. તેમણે આરોપ લગાવ્યો કે 'પહલ ન્યુટ્રિશન' નકલી પ્રોડક્ટ્સ વેચીને યુવાનોના સ્વાસ્થ્ય સાથે ચેડાં કરી રહ્યું હતું અને તેના બદલામાં ગેંગસ્ટર રોહિત ગોદારાને ખંડણીના પૈસા પહોંચાડતું હતું. શૂટરોએ રોહિત ગોદારાને "દેશદ્રોહી" અને "પાકિસ્તાની એજન્ટ" ગણાવી ચેતવણી આપી છે કે જે કોઈ પણ ગોદારાને આર્થિક મદદ કરશે તેની હાલત પણ આવી જ કરવામાં આવશે.
આ ધમકીભરી પોસ્ટમાં માત્ર વેપારીઓ જ નહીં, પણ જાણીતી ગાયિકા માસૂમ શર્માનું નામ પણ ઉછળ્યું છે. ગેંગસ્ટરોએ તેને હરિયાણાના સરપંચોની માફી માંગવા અથવા ગંભીર પરિણામો ભોગવવા માટે તૈયાર રહેવા જણાવ્યું છે. આ પોસ્ટમાં "જય મહાકાલ" અને "જય શ્રી રામ" ના નારા સાથે અન્ય ગેંગ્સ (જીતેન્દ્ર ગોગી, હાશિમ બાબા અને કાલા રાણા) ના નામનો પણ ઉલ્લેખ કરવામાં આવ્યો છે, જે હરિયાણામાં ગેંગવોરની ભીતિ દર્શાવે છે.
સાગર સિંહના અહેવાલ મુજબ, આ ઘટના બાદ સોનીપતમાં ભયનો માહોલ છે. સોશિયલ મીડિયા પર હથિયારો સાથે વીડિયો પોસ્ટ કરીને કાયદાના લીરેલીરા ઉડાડતા આ ગુંડાઓ સામે પોલીસે કડક તપાસ શરૂ કરી છે. સાયબર સેલ આ પોસ્ટના લોકેશન અને તેમાં દેખાતા શખ્સોની ઓળખ કરવામાં લાગી ગઈ છે. આ ઘટના ગેંગસ્ટરો દ્વારા સોશિયલ મીડિયાનો ઉપયોગ કરીને દહેશત ફેલાવવાની વધી રહેલી પ્રવૃત્તિનું વધુ એક ઉદાહરણ છે