ઈસ્લામાબાદ:  દક્ષિણ એશિયામાં યુદ્ધના નગારા વાગી ચૂક્યા છે અને પાકિસ્તાન-અફઘાનિસ્તાન સરહદ હવે એક સળગતું રણમેદાન બની ગઈ છે. પાકિસ્તાનના સંરક્ષણ મંત્રી ખ્વાજા આસિફે શુક્રવારે સત્તાવાર રીતે જાહેર કર્યું છે કે બંને દેશો હવે "ખુલ્લા યુદ્ધ" ની સ્થિતિમાં છે. આ જાહેરાત પાકિસ્તાની વાયુસેના દ્વારા અફઘાનિસ્તાનની રાજધાની કાબુલ અને અન્ય શહેરો પર કરવામાં આવેલા ભીષણ હવાઈ હુમલા બાદ કરવામાં આવી છે. પાકિસ્તાની સેનાનો દાવો છે કે તેમણે 'ઓપરેશન રાઈટિયસ ફ્યુરી' હેઠળ ૨૭૪ તાલિબાન લડવૈયાઓને ઠાર કર્યા છે અને તેમના ૨૨ થી વધુ વ્યૂહાત્મક ઠેકાણાઓને જમીનદોસ્ત કરી નાખ્યા છે.

આ સંઘર્ષની શરૂઆત ગુરુવારે રાત્રે થઈ હતી જ્યારે તાલિબાન દળોએ અત્યાધુનિક હથિયારો સાથે પાકિસ્તાની લશ્કરી ચોકીઓ પર હુમલો કર્યો હતો. તાલિબાને દાવો કર્યો છે કે તેમના વળતા પ્રહારમાં ૫૫ પાકિસ્તાની સૈનિકો માર્યા ગયા છે અને તેમણે સરહદ પરની અનેક ચોકીઓ પર પોતાનો કબજો જમાવી લીધો છે. પાકિસ્તાન લાંબા સમયથી આરોપ લગાવી રહ્યું હતું કે અફઘાનિસ્તાન TTP (તહરીક-એ-તાલિબાન પાકિસ્તાન) ના આતંકવાદીઓને આશ્રય આપી રહ્યું છે. સંરક્ષણ મંત્રી આસિફે કડક શબ્દોમાં કહ્યું કે હવે પાકિસ્તાનની ધીરજ ખૂટી ગઈ છે અને દરેક આક્રમણનો જડબાતોડ જવાબ હવામાંથી અને જમીન પરથી આપવામાં આવશે.

વણસતી જતી આ પરિસ્થિતિને કારણે સમગ્ર સરહદી વિસ્તારમાં હાઈ-એલર્ટ જાહેર કરી દેવામાં આવ્યું છે. ૨૬ ફેબ્રુઆરીએ અફઘાન દળોએ કરેલા મોટા હુમલા બાદ પાકિસ્તાને નંગરહાર, પક્તિકા અને ખોસ્ત પ્રાંતોમાં ISIS અને TTP ના કેમ્પો પર બોમ્બમારો તેજ કર્યો છે. બંને દેશો વચ્ચેની આ લડાઈ હવે માત્ર સરહદી વિવાદ નથી રહી પરંતુ એક પૂર્ણ કક્ષાના યુદ્ધમાં ફેરવાઈ ગઈ છે, જેની અસર સમગ્ર એશિયાના રાજકારણ અને શાંતિ પર પડી શકે છે. આંતરરાષ્ટ્રીય સમુદાય આ લોહિયાળ જંગને રોકવા માટે અપીલ કરી રહ્યો છે, પરંતુ બંને પક્ષો હાલમાં પીછેહઠ કરવાના મૂડમાં જણાતા નથી.