ચિત્રકૂટ : શ્રી સદગુરુ સેવા સંઘ ટ્રસ્‍ટ, ચિત્રકૂટના નિયામક અને ટ્રસ્‍ટી પદ્મશ્રી ડો. બી. કે. જૈનનું દુઃખદ અવસાન થયું છે. પાંચ દાયકાથી વધુ સમય સુધી લાખો લોકોની આંખોમાં રોશની આપનાર આ મહાન સેવાભાવીના નિધનથી મેડિકલ અને સામાજિક ક્ષેત્રે કયારેય ન પુરાય તેવી ખોટ પડી છે.

માનવસેવા અને પરોપકારના પથ પર અવિરત ચાલનારા પદ્મશ્રી ડો. બી. કે. જૈન અનંત યાત્રાએ નીકળી ગયા છે. શ્રી રણછોડદાસજી મહારાજના આશીર્વાદ અને માર્ગદર્શન હેઠળ તેમણે પોતાનું સંપૂર્ણ જીવન ‘સેવા' માટે સમર્પિત કરી દીધું હતું. ડો. જૈન માત્ર એક કુશળ તબીબ જ નહીં, પરંતુ કરુણા અને સમર્પણની જીવંત મૂર્તિ સમાન હતા.

તેમણે ચિત્રકૂટની ભૂમિ પર રહીને હજારો-લાખો ગરીબ અને જરૂરિયાતમંદ દર્દીઓની શષાક્રિયા કરી તેમને દૃષ્ટિ -દાન કરી હતી. તેમના પાંચ દાયકાના સેવાયજ્ઞને કારણે જ અનેક ઘરોમાં આશાનો દીપ પ્રગટયો હતો. તેમની વિનમ્રતા અને પૂજ્‍ય ગુરુદેવ પ્રત્‍યેની અતૂટ શ્રદ્ધાએ તેમને લોકપ્રિય બનાવ્‍યા હતા.

અંતિમ વિદાયની વિગતો : અંતિમ દર્શન : આજે તારીખ ૨૮-૨-૨૦૨૬ ના સવારે ૧૧ થી સાંજે ૫ વાગ્‍યા સુધી તેમના ચિત્રકૂટ સ્‍થિત નિવાસસ્‍થાને કરી શકાશે.

અંતિમ સંસ્‍કાર : આવતી કાલે રવિવાર, ૧-૩-૨૦૨૬ ના રોજ સવારે ૧૦ વાગ્‍યે સદગુરુ પરિસર, ચિત્રકૂટ ખાતે સંપન્ન થશે.

ડો. બી. કે. જૈનની વિદાયથી સમગ્ર સદગુરુ પરિવાર અને તેમના અસંખ્‍ય ચાહકોમાં ઘેરો શોક વ્‍યાપી ગયો છે. પ્રભુ તેમના પવિત્ર આત્‍માને પરમ શાંતિ અર્પે અને ગુરુચરણોમાં સ્‍થાન આપે તેવી ભાવપૂર્ણ પ્રાર્થના કરવામાં આવી રહી છે.