નવી દિલ્હી: મધ્ય પૂર્વમાં ઈઝરાયેલ અને ઈરાન વચ્ચે ફાટી નીકળેલા ભીષણ યુદ્ધની જ્વાળાઓ હવે આંતરરાષ્ટ્રીય આકાશ સુધી પહોંચી છે. ઈઝરાયેલે નાગરિક ઉડ્ડયનો માટે પોતાનું હવાઈ ક્ષેત્ર (Airspace) સંપૂર્ણપણે બંધ કરી દેતા અને ઈરાને કરેલા મિસાઈલ હુમલા બાદ વિશ્વભરની એરલાઈન્સમાં હડકંપ મચી ગયો છે. ભારતની અગ્રણી એરલાઈન્સ એર ઈન્ડિયા અને ઈન્ડિગોએ સાવચેતીના પગલા રૂપે મધ્ય પૂર્વના તમામ સ્થળોની ફ્લાઈટ્સ તાત્કાલિક અસરથી રદ કરવાની જાહેરાત કરી છે.

એર ઈન્ડિયાએ પ્રવાસીઓ માટે જારી કરેલી એડવાઈઝરીમાં જણાવ્યું છે કે મુસાફરો અને ક્રૂ મેમ્બર્સની સુરક્ષા સાથે કોઈ સમજૂતી કરી શકાય તેમ નથી, તેથી ખાડી દેશોની તમામ સેવાઓ હાલ પૂરતી સ્થગિત છે. ઈન્ડિગોએ પણ બદલાતા સુરક્ષા માહોલને ધ્યાનમાં રાખીને મધ્ય પૂર્વની તમામ ઉડ્ડયન કામગીરી અટકાવી દીધી છે. માત્ર ભારત જ નહીં, પરંતુ વૈશ્વિક સ્તરે પણ હવાઈ વ્યવહાર ખોરવાયો છે. જર્મનીની લુફ્થાન્સા અને હંગેરીની વિઝ એર એ 7 માર્ચ સુધી તેલ અવીવ, બેરૂત અને અબુ ધાબીની ફ્લાઈટ્સ સ્થગિત કરી છે.

યુદ્ધના કારણે પ્રભાવિત થયેલી મુખ્ય એરલાઈન્સની યાદી:

યુદ્ધના કારણે એરસ્પેસ બંધ થવાથી વિમાનોએ હવે હજારો કિલોમીટર લાંબો રૂટ લેવો પડી રહ્યો છે, જેના કારણે ઈંધણના વપરાશમાં વધારો અને મુસાફરીના સમયમાં તોતિંગ વધારો થયો છે. એરપોર્ટ ઓથોરિટીના જણાવ્યા અનુસાર, જ્યાં સુધી સુરક્ષાની ખાતરી નહીં મળે ત્યાં સુધી આ પ્રતિબંધો ચાલુ રહી શકે છે. મધ્ય પૂર્વમાં ફસાયેલા મુસાફરોને એરલાઈન્સના સંપર્કમાં રહેવા અને નવીનતમ અપડેટ્સ ચેક કરતા રહેવા વિનંતી કરવામાં આવી છે.