નવી દિલ્હી:ભારતની વધતી જતી વૈશ્વિક ભૂમિકા અને આર્થિક તાકાતને પ્રદર્શિત કરવાના હેતુથી યોજાયેલી 'રાઇઝિંગ ભારત સમિટ 2026' નો બીજો દિવસ અત્યંત પ્રભાવશાળી રહ્યો. 'સ્ટ્રેન્થ વિધીન' (આંતરિક શક્તિ) ની થીમ પર આધારિત આ સમિટમાં દેશ-વિદેશના અગ્રણી નેતાઓ, ઉદ્યોગપતિઓ અને રમતગમતના આઇકોન્સે ભાગ લીધો હતો. આ પ્લેટફોર્મ પર ભારત કેવી રીતે આત્મનિર્ભરતા અને નવીનતા દ્વારા ભવિષ્યની વ્યૂહરચના ઘડી રહ્યું છે તેની વિસ્તૃત ચર્ચા કરવામાં આવી હતી.
  સમિટમાં બોલતા 'આઇડિયાફોર્જ' ના સીઈઓ અંકિત મહેતાએ જણાવ્યું હતું કે, 2020 થી ભારતની સંરક્ષણ ખરીદી પ્રક્રિયામાં ક્રાંતિકારી ફેરફાર આવ્યો છે. જે કામમાં પહેલા વર્ષો લાગતા હતા તે હવે નવી DAP પ્રણાલીને કારણે અઠવાડિયામાં પૂર્ણ થાય છે. બીજી તરફ, MeitY ના અભિષેક સિંહે દેશના ડિજિટલ ઈન્ફ્રાસ્ટ્રક્ચર વિશે મહત્વની વાત કરી હતી. તેમણે જણાવ્યું કે જો 20 કરોડ લોકો AI સેવાઓનો ઉપયોગ કરશે, તો ભારતને તેની માંગને પહોંચી વળવા માટે ઓછામાં ઓછા 1 થી 2 લાખ GPU (Graphics Processing Unit) ની જરૂર પડશે.
  રમતગમતના સત્રમાં ભારતીય ફાસ્ટ બોલર મોહમ્મદ શમી 2023 ના વર્લ્ડ કપની યાદો તાજી કરતા ભાવુક થઈ ગયા હતા. તેમણે સ્થાનિક ભાષાઓમાં કોમેન્ટ્રીને સમર્થન આપતા કહ્યું કે, ગામડાના લોકો માટે પોતાની ભાષામાં રમત સમજવી વધુ આનંદદાયક હોય છે. ભૂતપૂર્વ કેપ્ટન મિતાલી રાજે ટીમમાં વિશ્વાસ અને ધીરજ રાખવાની સલાહ આપી હતી, જ્યારે સ્પિનર યુઝવેન્દ્ર ચહલે 'ટીમની જીત' ને જ સર્વોપરી ગણાવી હતી.
નાણાકીય ક્ષેત્રે સેબીના કમલેશ ચંદ્ર વાર્શ્નેયએ ભારતીય શેરબજારની વિશિષ્ટતા સમજાવતા કહ્યું કે ભારતની T+1 સેટલમેન્ટ સિસ્ટમ હવે અમેરિકા જેવા દેશો પણ અપનાવી રહ્યા છે. જોકે, આદિત્ય બી. ચેટર્જીએ એક ચિંતાજનક આંકડો પણ આપ્યો કે ભારતે છેતરપિંડીને કારણે ₹34,000 કરોડનું નુકસાન વેઠવું પડ્યું છે. દિવસની શરૂઆત આધ્યાત્મિક વાતાવરણમાં થઈ હતી, જ્યાં યુકેની કલાકાર રાધિકા દાસે 'હરે કૃષ્ણ' ના મંત્રોચ્ચારથી શ્રોતાઓને મંત્રમુગ્ધ કર્યા હતા. લશ્કરી ઇતિહાસકાર એડ્રિયન ફોન્ટાનેલાઝે ભારતને વિશ્વની ચાર-પાંચ સૌથી શક્તિશાળી સત્તાઓમાંની એક ગણાવીને સમિટની ગરિમા વધારી હતી