મુંબઈ:  દેશના રસ્તાઓ પર અત્યારે નવી નક્કોર ગાડીઓનો સૈલાબ જોવા મળી રહ્યો છે. સોસાયટી ઓફ ઇન્ડિયન ઓટોમોબાઇલ મેન્યુફેક્ચરર્સ ના તાજેતરના આંકડા મુજબ, મહારાષ્ટ્ર ફરી એકવાર ભારતનું સૌથી મોટું કાર માર્કેટ બનીને ઉભર્યું છે. ૨૦૨૫ના ત્રીજા ક્વાર્ટરમાં દેશમાં વેચાયેલી કુલ ૧૨.૭૬ લાખ કારમાંથી ૧૨.૪% હિસ્સો માત્ર મહારાષ્ટ્રનો જ રહ્યો છે. આ આંકડો માત્ર સંખ્યા નથી, પરંતુ રાજ્યની મજબૂત માળખાગત સુવિધાઓ અને લોકોની વધતી જતી આવકનો પુરાવો છે. ઉત્તર પ્રદેશ ૧૦.૮% સાથે બીજા ક્રમે રહ્યું છે, જ્યારે ગરવી ગુજરાત ૮.૨% ના હિસ્સા સાથે ત્રીજા સ્થાને રહીને ઓટોમોબાઇલ ક્ષેત્રે પોતાની ધાક જમાવી રહ્યું છે.

આ વખતે વેચાણના આંકડાઓમાં એક નવો વલણ જોવા મળ્યો છે—લોકો હવે નાની કારને બદલે યુટિલિટી વ્હીકલ્સ અને એસયુવી (SUV) પર વધુ પસંદગી ઉતારી રહ્યા છે. કુલ વેચાણના લગભગ બે-તૃતીયાંશ ભાગમાં SUV અને ક્રોસઓવર ગાડીઓનો દબદબો રહ્યો છે. ટાટા પંચ, નેક્સન, મારુતિ ગ્રાન્ડ વિટારા અને હ્યુન્ડાઇ ક્રેટા જેવા મોડલ્સની એટલી માંગ છે કે તેના માટે લાંબુ વેઇટિંગ લિસ્ટ જોવા મળી રહ્યું છે. પશ્ચિમ ઝોન (મહારાષ્ટ્ર, ગુજરાત અને રાજસ્થાન) દેશનું સૌથી સક્રિય માર્કેટ બની ગયું છે, જ્યાં માત્ર ત્રણ મહિનામાં ૪.૨૧ લાખથી વધુ વાહનો વેચાયા છે. ગ્રામીણ વિસ્તારોમાં પણ મારુતિ જેવી કંપનીઓએ મજબૂત પકડ જમાવી છે, જે દર્શાવે છે કે ભારતનું ગ્રામીણ અર્થતંત્ર પણ હવે ગિયર બદલી રહ્યું છે.

ચોંકાવનારી વાત એ છે કે દેશની રાજધાની દિલ્હીમાં કાર વેચાણની ગતિ અન્ય રાજ્યોની સરખામણીએ ધીમી પડી છે. દિલ્હીનો હિસ્સો માત્ર ૪.૮% રહ્યો છે, જેનું મુખ્ય કારણ વધતો ટ્રાફિક, પાર્કિંગની સમસ્યા અને પ્રદૂષણને નિયંત્રિત કરવા માટે સરકાર દ્વારા લેવામાં આવતા કડક પગલાં માનવામાં આવે છે. બીજી તરફ, સરળ બેંક લોન અને જીએસટી (GST) સુધારા બાદ કાર ખરીદવી સામાન્ય માણસ માટે વધુ સુલભ બની છે. કોવિડ-૧૯ પછી લોકો જાહેર પરિવહનને બદલે પોતાની ખાનગી કારમાં મુસાફરી કરવાનું વધુ પસંદ કરી રહ્યા છે. આ બદલાતા ટ્રેન્ડને કારણે ઓટો મેન્યુફેક્ચરર્સ હવે માઇક્રો અને કોમ્પેક્ટ એસયુવી સેગમેન્ટમાં સતત નવા મોડલ્સ લોન્ચ કરી રહ્યા છે, જે આગામી સમયમાં બજારને વધુ ગતિ આપશે.