દુબઈ/અબુ ધાબી:  યુએઈ: દુબઈ અને અબુ ધાબી પર ઈરાનનો ભયાનક મિસાઈલ મારો: આકાશમાં ૬,૦૦૦ ફૂટની ઊંચાઈએ મોતની ત્રાટકતી મિસાઈલો, ખાડી દેશોમાં હાઈ એલર્ટ 

મધ્ય પૂર્વના આકાશમાં ફરી એકવાર યુદ્ધના વાદળો ઘેરાયા છે. ઈરાને વળતો પ્રહાર કરતા સંયુક્ત આરબ અમીરાત અને બહેરીન પર અત્યારે  રાતે  અડધો ડઝન જેટલી લાંબા અંતરની બેલેસ્ટિક મિસાઈલો છોડીને ખળભળાટ મચાવી દીધો છે. આ હુમલાને કારણે દુબઈ અને અબુ ધાબી જેવા વ્યસ્ત શહેરોમાં ભયનો માહોલ જોવા મળી રહ્યો છે.

 * આકાશી હુમલો: આજે શનિવારે રાત્રે આશરે ૬,૦૦૦ ફૂટની ઊંચાઈએથી મિસાઈલો દુબઈ અને અબુ ધાબી તરફ આગળ વધતી જોવા મળી હતી. આ દ્રશ્યો જોઈને સ્થાનિકોમાં ભારે ફફડાટ ફેલાયો હતો.

 * યુએસ સૈન્ય મથકો નિશાના પર: ઈરાને ખાસ કરીને અબુ ધાબીમાં આવેલા અમેરિકી સૈન્ય મથક 'અલ ધાફરા એર બેઝ' અને બહેરીન સ્થિત અમેરિકી નૌસેનાના પાંચમાં કાફલા (યુએસ ફિફ્થ ફ્લીટ) ના મુખ્ય મથકને નિશાન બનાવ્યા હોવાનું સત્તાવાર સૂત્રો પાસેથી જાણવા મળ્યું છે.

 * જાનમાલનું નુકસાન: અબુ ધાબીની એર ડિફેન્સ સિસ્ટમે મિસાઈલોને હવામાં તોડી પાડી હતી, પરંતુ તેના કાટમાળના કારણે એક એશિયન વ્યક્તિનું કરુણ મોત નીપજ્યું છે. દુબઈના જેબેલ અલી વિસ્તારમાં પણ પ્રચંડ વિસ્ફોટોના અવાજો સંભળાયા હતા.

 * વિમાની સેવાઓ ખોરવાઈ: મિસાઈલ હુમલા બાદ સુરક્ષાના કારણોસર યુએઈના એરસ્પેસ એટલે કે હવાઈ ક્ષેત્રને તાત્કાલિક અસરથી આંશિક રીતે બંધ કરી દેવામાં આવ્યું છે. આના કારણે ભારત સહિત દુનિયાભરની સેંકડો ફ્લાઈટ્સ પર તેની માઠી અસર પડી છે.

ઈરાને ચીમકી આપી છે કે જો તેમના પરના હુમલા નહીં અટકે તો આગામી સમયમાં આનાથી પણ વધુ ભયાનક વળતો પ્રહાર કરવામાં આવશે. હાલમાં ભારતીય દૂતાવાસે પણ ત્યાં રહેતા ભારતીયોને સતર્ક રહેવા અને બિનજરૂરી બહાર ન નીકળવા સૂચના આપી છે. *