ઈન્દોર:જો તમે ખાણીપીણીના શોખીન હોવ અને ઈન્દોર જાવ, તો ત્યાંના 'સરાફા બજાર'ની મુલાકાત લીધા વગર તમારી સફર અધૂરી ગણાય. આ દુનિયાનું કદાચ એકમાત્ર એવું બજાર છે જ્યાં સૂર્ય આથમતાની સાથે જ એક અનોખો પલટો આવે છે. દિવસ દરમિયાન અહીં કરોડોના હીરા અને સોના-ચાંદીના દાગીનાનો વેપાર થાય છે, પરંતુ જેવું ઝવેરીઓ પોતાનું શટર પાડે, એટલે તરત જ આ ગલી 'ખાઉ-ગલી'માં ફેરવાઈ જાય છે. રાત્રે ૧:૦૦ વાગ્યા સુધી અહીં સ્વાદનો એવો મેળો જામશે કે તમે દાગીનાની ચમક ભૂલી જશો!
  આ સ્વાદિષ્ટ પરંપરાનો પાયો ૧૮મી સદીમાં રાણી અહિલ્યાબાઈ હોલ્કરના શાસનકાળમાં નંખાયો હતો. ઈન્દોરના મહારાજાઓ વિદેશી સંસ્કૃતિથી પ્રભાવિત હતા, જેના કારણે અહીંના રસોડામાં ભારતીય મસાલા અને પશ્ચિમી રાંધણકળાનું અનોખું મિશ્રણ જોવા મળે છે. સરાફા બજારમાં રાત્રે ફૂડ સ્ટોલ્સ શરૂ થવા પાછળનો ઈતિહાસ પણ રસપ્રદ છે. જે લોકો મોંઘા ઘરેણાં ખરીદી શકતા નહોતા, તેઓ માત્ર બજારની રોનક જોવા આવતા. આ મુલાકાતીઓની ભૂખ સંતોષવા માટે નાના-નાના લારી-ગલ્લા શરૂ થયા, જે આજે વિશ્વભરમાં પ્રખ્યાત થઈ ગયા છે.
 ભુટ્ટે કા કીસ: માલવા પ્રદેશની આ સૌથી ખાસ વાનગી છે. દેશી ઘીમાં મકાઈને છીણીને તૈયાર કરવામાં આવતી આ વાનગી હોલ્કર પરિવારના મહેમાનોની પહેલી પસંદ રહેતી.
ગરાડુ: શિયાળામાં ઈન્દોરની શાન એટલે ગરાડુ! શક્કરિયા જેવી આ વનસ્પતિને તેલમાં તળીને તેના પર ખાસ ચટપટો મસાલો છાંટીને પીરસવામાં આવે છે.
જોશીજીના દહીં-બડા: જોશીજીના ત્યાં દહીં-બડા ખાવા એ એક લ્હાવો છે. અહીં સ્વાદ તો છે જ, પણ દહીં-બડાને હવામાં ઉછાળવાની તેમની કળા અને મસાલેદાર વાતો લોકોને ખેંચી લાવે છે.
દાળ-બાફલા: આ માત્ર વાનગી નથી પણ ઈન્દોરનો ઈતિહાસ છે. પ્રાચીન સમયમાં વેપારીઓ લાંબી મુસાફરીમાં 'બાફલા' સાથે રાખતા કારણ કે તે અઠવાડિયા સુધી બગડતા નથી.
જો તમે પણ સ્વાદના શોખીન હોવ, તો ઈન્દોરનો આ 'સ્વાદનો સરાફા' તમારી રાહ જોઈ રહ્યો છે. દાગીના તો કદાચ કબાટમાં રહેશે, પણ અહીંનો સ્વાદ તમારા મન પર હંમેશા માટે અંકિત થઈ જશે. આગામી અંકમાં આપણે ભોપાલના નવાબી રસોડાની સફર કરીશું, જ્યાં 'ભોપાલી પાસંદે' જેવી અજાણી વાનગીઓનો ઈતિહાસ છુપાયેલો છે