વોશિંગ્ટન:  ઈરાન પર અમેરિકા અને ઈઝરાયેલના સંયુક્ત લશ્કરી હુમલા બાદ મધ્ય પૂર્વમાં પરિસ્થિતિ અત્યંત સ્ફોટક બની ગઈ છે. આ ભીષણ કાર્યવાહી વચ્ચે અમેરિકી પ્રમુખ ડોનાલ્ડ ટ્રમ્પે શનિવારે એક મોટો દાવો કરીને વિશ્વને ચોંકાવી દીધું છે. ટ્રમ્પે જણાવ્યું હતું કે, તેહરાન પર કરવામાં આવેલા લશ્કરી હુમલાનો મુખ્ય ઉદ્દેશ્ય ઈરાની જનતાને તેમના દમનકારી શાસનમાંથી "સ્વતંત્રતા" અપાવવાનો છે. ટ્રમ્પે ઈરાની નાગરિકોને સંબોધતા કહ્યું, "તમારી આઝાદીનો સમય આવી ગયો છે, તમારી સરકાર પર કબજો કરવાની આ ઐતિહાસિક તક છે."

    ટ્રમ્પના આ નિવેદન પૂર્વે, અમેરિકન અને ઈઝરાયેલી વાયુસેનાએ ઈરાનના અનેક મહત્વના લશ્કરી મથકો અને સરકારી સંકુલ પર બોમ્બમારો કર્યો હતો. હાઈ-રિઝોલ્યુશન સેટેલાઈટ તસવીરોમાં ઈરાનના સર્વોચ્ચ નેતા આયાતુલ્લાહ અલી ખામેનીના સત્તાવાર નિવાસસ્થાનમાં ભારે વિનાશ જોવા મળ્યો છે. અનેક ઈમારતો ધરાશાયી થઈ ગઈ છે અને ચારેબાજુ ધુમાડાના ગોટેગોટા જોવા મળી રહ્યા છે. ટ્રમ્પે હુમલા પહેલા જ ઈરાની સેનાને હથિયાર નીચે મૂકી દેવા અથવા "ચોક્કસ મૃત્યુ" નો સામનો કરવા સ્પષ્ટ ચેતવણી આપી હતી.
 બીજી તરફ, ઈરાનના વિદેશ પ્રધાન સઈદ અબ્બાસ અરાઘચીએ આરોપ લગાવ્યો છે કે ઈઝરાયેલી હુમલામાં પૂર્વી ઈરાનની એક કન્યા પ્રાથમિક શાળાને નિશાન બનાવવામાં આવી છે, જેમાં અસંખ્ય માસૂમ બાળકીઓ સહિત ૫૦થી વધુ લોકોના મોત થયા છે. આ હુમલાના જવાબમાં ઈરાને પણ વળતો પ્રહાર કરતા મધ્ય પૂર્વમાં આવેલા એક અમેરિકી સૈન્ય મથક પર મિસાઈલો છોડી છે, જેનાથી યુદ્ધનો વ્યાપ આખા પ્રદેશમાં ફેલાઈ ગયો છે.
   ભારત સહિત સમગ્ર વિશ્વ અત્યારે આ લોહિયાળ સંઘર્ષ પર નજર રાખી રહ્યું છે. ટ્રમ્પનું માનવું છે કે આ કાર્યવાહી ઈરાનને પરમાણુ શક્તિ બનતું રોકવા અને ત્યાં લોકશાહી સ્થાપવા માટે જરૂરી છે. જોકે, જે રીતે રહેણાંક વિસ્તારો અને શાળાઓ પર બોમ્બ પડી રહ્યા છે, તે જોતા માનવીય કટોકટી સર્જાવાની ભીતિ સેવાઈ રહી છે. હવે જોવાનું એ રહેશે કે ઈરાની જનતા ટ્રમ્પની આ "સ્વતંત્રતા" ની હાકલને કેવી રીતે પ્રતિસાદ આપે છે.