દુબઈ: પૂર્વ અને પશ્ચિમના દેશોને જોડતા સૌથી મોટા હવાઈ હબ ગણાતા દુબઈ પર ૨૮ ફેબ્રુઆરીની રાત્રિ કાળી સાબિત થઈ છે. અમેરિકા અને ઈઝરાયેલના હુમલાના વિરોધમાં ઈરાને છેડેલા 'મિસાઈલ યુદ્ધ'એ પ્રવાસન માટે જાણીતા આ શહેરને રણભૂમિમાં ફેરવી દીધું છે. ઈરાન તરફથી છોડવામાં આવેલી મિસાઈલોએ દુબઈ ઈન્ટરનેશનલ એરપોર્ટ (DXB) અને વિશ્વ વિખ્યાત બુર્જ અલ અરબ હોટલને નિશાન બનાવતા માળખાગત નુકસાન નોંધાયું છે. દુબઈ મીડિયા ઓફિસના જણાવ્યા અનુસાર, એરપોર્ટના કોન્કોર્સ વિસ્તારમાં થયેલા નુકસાનને કાબૂમાં લેવામાં આવ્યું છે, પરંતુ આ હુમલાએ વૈશ્વિક ઉડ્ડયન ક્ષેત્રમાં ભયનો માહોલ પેદા કરી દીધો છે.

સોશિયલ મીડિયા પર વાયરલ થયેલા રિયલ-ટાઇમ વીડિયોમાં દુબઈના આકાશમાં ધુમાડાના ગોટા અને મિસાઈલ ઈન્ટરસેપ્ટર્સની લાઈટો જોવા મળી રહી છે, જે આધુનિક ઈતિહાસમાં અમીરાત માટે ક્યારેય ન જોયેલું દ્રશ્ય છે. લક્ઝરી લાઈફસ્ટાઈલ માટે જાણીતા પામ જુમેરાહ ટાપુ પર મિસાઈલના ટુકડા પડતા ભીષણ આગ ફાટી નીકળી હતી, જેમાં ચાર લોકો ગંભીર રીતે ઘાયલ થયા હોવાના અહેવાલ છે. ત્યાં આવેલી એક પ્રખ્યાત રિસોર્ટ હોટલ મિસાઈલના કાટમાળની ચપેટમાં આવતા પર્યટકોમાં ભારે નાસભાગ મચી ગઈ હતી. હુમલાને પગલે દુબઈ અને અબુ ધાબી જતી તમામ આંતરરાષ્ટ્રીય ફ્લાઈટ્સને રદ અથવા ડાયવર્ટ કરવામાં આવી છે.

સૌથી દુખદ પાસું એ છે કે આ હુમલા એવા સમયે થયા છે જ્યારે સમગ્ર ઈસ્લામિક વિશ્વ રમઝાનનો પવિત્ર મહિનો મનાવી રહ્યું છે. દુબઈમાં મોડી રાત સુધી કાફે અને રેસ્ટોરાં લોકોથી છલોછલ હોય છે, ત્યારે આ આકાશી આફતે લોકોના જીવ જોખમમાં મૂક્યા હતા. માત્ર યુએઈ જ નહીં, પરંતુ બહેરીનમાં આવેલા યુએસ બેઝ અને રહેણાંક વિસ્તારો પર પણ મિસાઈલો ત્રાટકી છે. કુવૈત એરપોર્ટના પેસેન્જર ટર્મિનલને ડ્રોન દ્વારા નિશાન બનાવવામાં આવતા ત્યાં કામ કરતા કેટલાક કર્મચારીઓ લોહીલુહાણ થયા છે, જે દર્શાવે છે કે ઈરાને સમગ્ર ગલ્ફ ક્ષેત્રને નિશાન બનાવવાની વ્યૂહરચના અપનાવી છે.

વૈશ્વિક નિષ્ણાતો આ હુમલાને 'એનર્જી અને ટ્રાન્સપોર્ટ વોર' તરીકે જોઈ રહ્યા છે, કારણ કે દોહા, દુબઈ અને અબુ ધાબી જેવા શહેરો પર હુમલો એટલે વિશ્વના આર્થિક હૃદય પર પ્રહાર સમાન છે. યુએસ અને ઈઝરાયેલની સંયુક્ત કાર્યવાહી બાદ ઈરાનની આ જવાબી કાર્યવાહીએ ખાડી દેશોમાં ત્રીજા વિશ્વયુદ્ધ જેવી સ્થિતિ ઊભી કરી છે. હાલમાં સ્થાનિક અધિકારીઓ કાટમાળ હટાવવાની અને ઘાયલોને મદદ કરવાની કામગીરી કરી રહ્યા છે, પરંતુ અનિશ્ચિત હવાઈ ક્ષેત્રને કારણે લાખો પ્રવાસીઓ અધવચ્ચે ફસાઈ ગયા છે. આગામી કલાકોમાં આ સંઘર્ષ કઈ દિશામાં ફંટાય છે તેના પર સમગ્ર વિશ્વની નજર ટકેલી છે.