નવી દિલ્હી: મધ્ય પૂર્વમાં ઇઝરાયલ અને અમેરિકાના સંયુક્ત સૈન્ય હુમલા બાદ સર્જાયેલી વિસ્ફોટક સ્થિતિને પગલે ભારતીય નાગરિક ઉડ્ડયન ક્ષેત્રમાં મોટું સંકટ ઊભું થયું છે. શનિવારે ઈરાનના સર્વોચ્ચ નેતા અલી ખામેનીની હત્યાના સમાચાર વહેતા થતાની સાથે જ સમગ્ર અખાતી વિસ્તારનું હવાઈ ક્ષેત્ર રણમેદાનમાં ફેરવાઈ ગયું છે. આ ગંભીર પરિસ્થિતિને ધ્યાનમાં રાખીને ભારતની અગ્રણી એરલાઇન્સ એર ઇન્ડિયા અને ઇન્ડિગોએ તેની સેંકડો ફ્લાઇટ્સ રદ કરવાની ફરજ પડી છે. શનિવારે ૪૧૦ ફ્લાઇટ્સ રદ થયા બાદ, આજે રવિવારે પણ ૪૪૪ આંતરરાષ્ટ્રીય ફ્લાઇટ્સના પૈડાં થંભી ગયા છે, જેના કારણે દુબઈ, અબુ ધાબી અને દોહા જેવા વ્યસ્ત એરપોર્ટ્સ પર હજારો ભારતીય પ્રવાસીઓ કોઈપણ સહાય વગર અટવાઈ પડ્યા છે.

એર ઇન્ડિયાએ પ્રવર્તમાન સંજોગોનું કાળજીપૂર્વક મૂલ્યાંકન કર્યા બાદ ૧ માર્ચની તેની મુખ્ય આંતરરાષ્ટ્રીય સેવાઓમાં મોટો કાપ મૂક્યો છે. એરલાઇન દ્વારા જારી કરવામાં આવેલી એડવાઇઝરી મુજબ, મુંબઈ-લંડન હીથ્રો, દિલ્હી-બર્મિંગહામ, દિલ્હી-એમ્સ્ટરડેમ, દિલ્હી-ઝુરિચ અને દિલ્હી-વિયેના જેવા અત્યંત મહત્વના રૂટ રદ કરવામાં આવ્યા છે. કંપનીએ સ્પષ્ટ કર્યું છે કે મુસાફરો અને ક્રૂ મેમ્બર્સની સલામતી તેમની સર્વોચ્ચ પ્રાથમિકતા છે. યુદ્ધગ્રસ્ત હવાઈ ક્ષેત્રમાંથી પસાર થવું જોખમી હોવાથી આ નિર્ણય લેવાયો છે. અસરગ્રસ્ત મુસાફરોને રિબુકિંગ અને વૈકલ્પિક વ્યવસ્થા માટે એરલાઇન દ્વારા સંપર્ક કરવામાં આવી રહ્યો છે, પરંતુ અનિશ્ચિતતાને કારણે મુસાફરોમાં ભારે રોષ અને ચિંતા જોવા મળી રહી છે.

બીજી તરફ, દેશની સૌથી મોટી એરલાઇન ઇન્ડિગોએ પણ મધ્ય પૂર્વ અને તેની આસપાસના વિસ્તારોમાં ચાલી રહેલી પરિસ્થિતિને જોતા તેની તમામ ફ્લાઇટ્સ ૨ માર્ચ ૨૦૨૬ના રોજ રાત્રે ૧૧:૫૯ સુધી સ્થગિત કરી દીધી છે. કતાર એરવેઝ અને એતિહાદ એરવેઝે પણ પોતપોતાના હવાઈ ક્ષેત્ર બંધ થવાને કારણે તમામ કામગીરી અસ્થાયી રૂપે અટકાવી દીધી છે. એતિહાદે અબુ ધાબીની ફ્લાઇટ્સ સોમવારે સવારે ૨:૦૦ વાગ્યા સુધી બંધ રાખવાની જાહેરાત કરી છે. ઉડ્ડયન નિયામક DGCA આ સમગ્ર સ્થિતિ પર બારીકાઈથી નજર રાખી રહ્યું છે અને એરલાઇન્સને સલામતીના કડક નિયમોનું પાલન કરવા આદેશ આપ્યો છે. એરપોર્ટ્સ પર ફસાયેલા ભારતીયો સોશિયલ મીડિયા પર પોતાની વ્યથા ઠાલવી રહ્યા છે, જ્યાં ભોજન અને રહેવાની સુવિધા માટે પણ સંઘર્ષ કરવો પડી રહ્યો છે.

મધ્ય પૂર્વમાં ફસાયેલા ભારતીયોની સુરક્ષા હવે ભારત સરકાર માટે મોટો પડકાર બની રહી છે. એરસ્પેસ બંધ થવાને કારણે એરલાઇન્સને લાંબા રૂટ લેવાની ફરજ પડી રહી છે, જેનાથી ઈંધણનો ખર્ચ અને મુસાફરીનો સમય બંનેમાં ધરખમ વધારો થયો છે. એર ઇન્ડિયા અને ઇન્ડિગોએ મુસાફરોને વિનંતી કરી છે કે તેઓ એરપોર્ટ પર આવતા પહેલા સત્તાવાર વેબસાઇટ પર ફ્લાઇટનું સ્ટેટસ ચોક્કસ તપાસે. જ્યાં સુધી ઈરાન અને ઇઝરાયલ વચ્ચેનો આ તણાવ શાંત ન થાય ત્યાં સુધી આંતરરાષ્ટ્રીય હવાઈ પરિવહન સામાન્ય થવાની કોઈ શક્યતા દેખાતી નથી. હાલમાં વિદેશ મંત્રાલય પણ અન્ય દેશો સાથે સંપર્કમાં છે જેથી ફસાયેલા નાગરિકોને સુરક્ષિત રીતે વતન લાવી શકાય.