લખનૌ: ઉત્તર પ્રદેશની રાજધાની લખનૌમાં સ્થિત ચૌધરી ચરણસિંહ આંતરરાષ્ટ્રીય એરપોર્ટ પર આજે ડિરેક્ટોરેટ ઓફ રેવન્યુ ઈન્ટેલિજન્સ (DRI) એ એક અત્યંત ચોકસાઈભર્યા ઓપરેશનમાં ડ્રગ્સના મોટા ખેપનો પર્દાફાશ કર્યો છે. બેંગકોકથી વાયા થાઈ એરએશિયાની ફ્લાઈટ FD-૧૪૬ માં મુસાફરી કરી રહેલા બે શંકાસ્પદ પેસેન્જરો પાસેથી આશરે ૧૮ કિલોગ્રામ અત્યંત મોંઘો અને પ્રતિબંધિત ‘હાઈડ્રોપોનિક ગાંજો’ જપ્ત કરવામાં આવ્યો છે. આ ડ્રગ્સની આંતરરાષ્ટ્રીય બજારમાં અંદાજિત કિંમત ૧૭.૯૬ કરોડ રૂપિયા (આશરે ૧૮ કરોડ રૂપિયા) આંકવામાં આવી રહી છે. DRI ની આ કાર્યવાહીને પગલે આંતરરાષ્ટ્રીય ડ્રગ માફિયાઓમાં ભારે ફફડાટ વ્યાપી ગયો છે.

DRI ની ટીમને અગાઉથી મળેલી ગુપ્ત માહિતીના આધારે એરપોર્ટ પર જાળ બિછાવવામાં આવી હતી. જેવા આ બંને મુસાફરો બેંગકોકથી ઉતરીને કસ્ટમ્સ ક્લિયરન્સ તરફ આગળ વધ્યા, કે તરત જ અધિકારીઓએ તેમને અટકાવીને તેમના સામાનની તલાશી લીધી હતી. સઘન તપાસ દરમિયાન તેમના સામાનમાંથી ૧૨ ગુલાબી રંગના પોલિથિન પેકેટ મળી આવ્યા હતા. શરૂઆતમાં સામાન્ય વસ્તુ જણાતા આ પેકેટોની તપાસ કરતા તેમાંથી ઉચ્ચ ગુણવત્તાવાળો હાઈડ્રોપોનિક ગાંજો મળી આવ્યો હતો. આ પ્રકારનો ગાંજો સામાન્ય રીતે લેબમાં અથવા નિયંત્રિત વાતાવરણમાં ઉગાડવામાં આવે છે અને તે સામાન્ય ગાંજા કરતા અનેકગણો મોંઘો અને નશાકારક હોય છે.

ધરપકડ કરાયેલા બંને દાણચોરોને કોર્ટમાં રજૂ કરી ન્યાયિક કસ્ટડીમાં મોકલી દેવામાં આવ્યા છે. DRI ના વરિષ્ઠ અધિકારીઓના જણાવ્યા અનુસાર, આ બંને આરોપીઓ માત્ર ‘કુરિયર’ તરીકે કામ કરી રહ્યા હતા કે પછી આ મોટા ડ્રગ કાર્ટેલના સક્રિય સભ્યો છે, તે દિશામાં ઉંડી પૂછપરછ હાથ ધરવામાં આવી રહી છે. પ્રાથમિક પૂછપરછમાં ડ્રગ્સની ડિલિવરી લખનૌ અને આસપાસના મેટ્રો શહેરોમાં થવાની હોવાના કેટલાક મહત્વપૂર્ણ સંકેતો મળ્યા છે. આ હાઈ-પ્રોફાઈલ ગાંજો ખાસ કરીને મોટા શહેરોની રેવ પાર્ટીઓ અને યુવાધનને નિશાન બનાવવા માટે મંગાવવામાં આવ્યો હોવાની આશંકા સેવાઈ રહી છે.

લખનૌ એરપોર્ટ પર છેલ્લા કેટલાક સમયથી સોના અને ડ્રગ્સની દાણચોરીની ઘટનાઓમાં નોંધપાત્ર વધારો થયો છે, જેના કારણે DRI અને કસ્ટમ્સ વિભાગે સુરક્ષા વ્યવસ્થા અત્યંત ચુસ્ત બનાવી દીધી છે. અધિકારીઓએ સ્પષ્ટ કર્યું છે કે બેંગકોક અને અન્ય દક્ષિણ-પૂર્વ એશિયાઈ દેશોથી આવતી ફ્લાઈટ્સ પર વિશેષ નજર રાખવામાં આવી રહી છે. અગાઉ પણ DRI એ આવી જ રીતે કરોડોની કિંમતનું ડ્રગ્સ ઝડપી પાડ્યું હતું, પરંતુ ૧૮ કરોડનો આ આંકડો આ વર્ષનો સૌથી મોટો કેસ માનવામાં આવે છે. આગામી દિવસોમાં આ દાણચોરીના માસ્ટરમાઈન્ડ સુધી પહોંચવા માટે આંતરરાષ્ટ્રીય તપાસ એજન્સીઓની પણ મદદ લેવામાં આવી શકે છે.