કરાચી:ઈરાન પર અમેરિકા અને ઈઝરાયેલ દ્વારા કરવામાં આવેલા તાજેતરના સૈન્ય હુમલાની જ્વાળાઓ હવે પાકિસ્તાન સુધી પહોંચી ગઈ છે. ઈરાનના સર્વોચ્ચ નેતા અયાતોલ્લા અલી ખમેનેઈના મૃત્યુના સમાચાર વહેતા થતા જ પાકિસ્તાનના કરાચીમાં સ્થિત અમેરિકી દૂતાવાસ (Consulate) બહાર હજારોની સંખ્યામાં દેખાવકારો ઉમટી પડ્યા હતા. આ દેખાવ એ સમયે હિંસક બન્યો જ્યારે ઉશ્કેરાયેલા ટોળાએ દૂતાવાસ પર પથ્થરમારો કરી બારીઓના કાચ તોડી નાખ્યા હતા. સ્થિતિને કાબૂમાં લેવા માટે સુરક્ષા દળોએ કરેલા ગોળીબારમાં ૮ લોકોના મોત નીપજ્યા હોવાના અહેવાલ છે.
ખમેનેઈ અને ઉચ્ચ કમાન્ડરોના મોતે ભડકાવી આગ
તેહરાન પર અમેરિકા અને ઈઝરાયેલ દ્વારા કરવામાં આવેલા સંયુક્ત અને સંકલિત હુમલામાં ઈરાનના સુપ્રીમ લીડર અયાતોલ્લા અલી ખમેનેઈ, શામખાની અને પાકપોર સહિતના અનેક ટોચના સૈન્ય અધિકારીઓ માર્યા ગયા છે. આ ઘટનાને પગલે કરાચીમાં પ્રદર્શનકારીઓએ લાકડીઓ અને પથ્થરો વડે અમેરિકી દૂતાવાસને નિશાન બનાવ્યું હતું. દેખાવકારો અમેરિકા અને ઈઝરાયેલ પર આ વિસ્તારમાં અસ્થિરતા ફેલાવવાનો આરોપ લગાવી રહ્યા છે.
ઈરાનનો અમેરિકી બેઝ પર વળતો પ્રહાર
પોતાના ટોચના નેતાઓના મોતના જવાબમાં ઈરાને મધ્ય પૂર્વમાં આવેલા તમામ અમેરિકી સૈન્ય મથકોને નિશાન બનાવવાની જાહેરાત કરી છે. ઈરાની સત્તાવાળાઓએ આ હુમલાઓને "મજબૂત અને નિર્ણાયક પ્રતિક્રિયા" ગણાવી છે. આ સંઘર્ષને કારણે સમગ્ર અખાતી દેશો અને પડોશી દેશોમાં યુદ્ધ જેવો માહોલ સર્જાયો છે.
સુરક્ષા દળોની કાર્યવાહી અને તણાવ
કરાચીમાં સ્થિતિ બેકાબૂ બનતા સુરક્ષા દળોએ ભીડને વિખેરવા માટે ફાયરિંગ શરૂ કર્યું હતું. આ હિંસામાં ૮ પ્રદર્શનકારીઓના મોત થયા છે અને અનેક લોકો ઘાયલ થયા હોવાની આશંકા છે. આ ઘટના બાદ પાકિસ્તાનમાં અમેરિકી મિશન અને તેની આસપાસ સુરક્ષા અભેદ્ય બનાવી દેવામાં આવી છે. સમગ્ર વિશ્વની નજર અત્યારે આ ક્ષેત્રમાં વધી રહેલા તણાવ અને ઈરાનના આગામી પગલાં પર ટકેલી છે.