મુંબઈ/તેહરાન:પશ્ચિમ એશિયામાં અમેરિકા અને ઈઝરાયેલ દ્વારા ઈરાન પર કરવામાં આવેલા ભીષણ હવાઈ હુમલાઓએ સમગ્ર વિશ્વમાં ખળભળાટ મચાવી દીધો છે. આ યુદ્ધની જ્વાળાઓની અસર હવે ગ્લેમર જગત પર પણ જોવા મળી રહી છે. ભારતમાં સ્થાયી થયેલી અને બોલીવુડમાં જાણીતું નામ ધરાવતી ઈરાની મૂળની અભિનેત્રી મંદાના કરીમી પોતાના વતનની હાલત જોઈને ધ્રુસકે ને ધ્રુસકે રડી પડી છે. ઈરાનમાં સુપ્રીમ લીડર ખામેનીના મોતના અહેવાલો અને ચારેબાજુ ફેલાયેલા વિસ્ફોટોના દ્રશ્યોએ મંદાનાને હચમચાવી દીધી છે, જેનો આક્રોશ અને પીડા તેણે સોશિયલ મીડિયાના માધ્યમથી ઠાલવી છે.

મંદાના કરીમીએ પોતાની ઈન્સ્ટાગ્રામ સ્ટોરી પર એક અત્યંત ભાવુક વીડિયો શેર કર્યો છે, જેમાં તેની આંખોમાં આંસુ અને ચહેરા પર લાચારી સ્પષ્ટ દેખાય છે. રડતા અવાજે તેણે વિશ્વને ઈરાન માટે પ્રાર્થના કરવાની અપીલ કરી છે. તેણે પોતાની પોસ્ટમાં એક માર્મિક વાત પણ લખી છે કે, "ભલે અત્યારે બહુ પીડા છે, પણ સાથે એક નવી આશા પણ છે. કદાચ આ વખતે ઈરાની નવું વર્ષ (નૌરોઝ) પરિવર્તનનો સંદેશ લઈને આવશે." મંદાનાની આ વાતે ઈરાનના સામાન્ય નાગરિકોની વર્ષોની ગૂંગળામણ અને દમનકારી શાસન સામેના આક્રોશને વાચા આપી છે.

સોશિયલ મીડિયા પર વાયરલ થઈ રહેલા જશ્નના વીડિયો અંગે મંદાનાએ સ્પષ્ટતા કરતા જણાવ્યું કે, કોઈ પણ માણસ યુદ્ધ કે માસૂમોના મોતથી ખુશ નથી હોતો, પરંતુ જ્યારે તમારી પાસે ખોવા માટે કંઈ જ બચ્યું ન હોય ત્યારે લોકો આ ભયાનક અંતને પણ સ્વીકારી લે છે. તેણે લખ્યું કે, ઈરાની લોકો વર્ષોથી જે ગૂંગળામણભર્યું વાતાવરણ વેઠી રહ્યા છે, તેમાંથી મુક્તિ મેળવવા માટે કદાચ તેઓ આ યુદ્ધને આશાની નજરે જોઈ રહ્યા છે. આ પરિવર્તન દાયકાઓના દમન બાદ શ્વાસ લેવાની એક તક સમાન છે, જે અત્યંત પીડાદાયક હોવા છતાં અનિવાર્ય જણાય છે.

મંદાના કરીમી મૂળ તેહરાનની છે અને તેણે ‘બિગ બોસ’ તેમજ ‘લોક અપ’ જેવા રિયાલિટી શો દ્વારા ભારતના ઘર-ઘરમાં ઓળખ બનાવી છે. ‘ક્યા કૂલ હૈ હમ’ જેવી ફિલ્મોમાં કામ કરી ચૂકેલી આ અભિનેત્રી આજે પોતાના પરિવાર અને મિત્રોની સુરક્ષાને લઈને ચિંતિત છે. મુંબઈમાં બેઠા-બેઠા તે સતત પોતાના વતનના સમાચાર મેળવી રહી છે. યુદ્ધની આ ભયાનકતા વચ્ચે મંદાનાની પોસ્ટ માત્ર એક સેલિબ્રિટીની પ્રતિક્રિયા નથી, પરંતુ એક એવા નાગરિકનો અવાજ છે જેનું બાળપણ અને યાદો અત્યારે બોમ્બમારામાં રાખ થઈ રહી છે.