મનામા, બહેરીન:પશ્ચિમ એશિયામાં ચાલી રહેલું સંઘર્ષ હવે નિયંત્રણ બહાર જઈ રહ્યું છે. અમેરિકા અને ઈઝરાયેલના હુમલામાં ઈરાનના સર્વોચ્ચ નેતા આયાતુલ્લાહ અલી ખામેનીના મોતના અહેવાલો બાદ ઈરાને વેર લેવા માટે ખાડી દેશો પર કાળઝાળ હુમલા શરૂ કર્યા છે. તાજેતરના અહેવાલો મુજબ, બહેરીનની રાજધાની મનામામાં આવેલી વિશ્વવિખ્યાત અને પ્રતિષ્ઠિત ‘ક્રાઉન પ્લાઝા હોટલ’ પર ઈરાની ડ્રોન ત્રાટક્યું છે. આ વિસ્ફોટ એટલો ભયાનક હતો કે હોટલના મકાનને મોટું નુકસાન પહોંચ્યું છે અને આસપાસનો વિસ્તાર ધ્રૂજી ઉઠ્યો છે. આ હુમલાએ સાબિત કરી દીધું છે કે ઈરાન હવે પશ્ચિમી દેશોના સાથી ગણાતા તમામ ગલ્ફ દેશોને નિશાન બનાવવાની રણનીતિ પર કામ કરી રહ્યું છે.

ક્રાઉન પ્લાઝા હોટલ પર ડ્રોન અથડાતાની સાથે જ ભીષણ આગ ફાટી નીકળી હતી અને આકાશમાં ધુમાડાના કાળા ગોટા જોવા મળ્યા હતા. હોટલમાં રોકાયેલા પ્રવાસીઓ અને સ્ટાફમાં નાસભાગ મચી ગઈ હતી. ઘટનાની જાણ થતા જ બહેરીન નાગરિક સંરક્ષણ (Civil Defense) ની ટીમો એમ્બ્યુલન્સ અને ફાયર ફાઈટરો સાથે ઘટનાસ્થળે દોડી ગઈ હતી અને રાહત તેમજ બચાવ કામગીરી હાથ ધરી હતી. ઈરાન દ્વારા શરૂ કરવામાં આવેલા આ ‘ઓપરેશન રિવન્જ’માં માત્ર બહેરીન જ નહીં, પરંતુ અનેક પડોશી દેશો પર મિસાઈલ અને ડ્રોનનો મારો ચલાવવામાં આવી રહ્યો છે, જેના કારણે આખા પ્રદેશમાં હાઈ એલર્ટ જાહેર કરી દેવામાં આવ્યું છે.

માત્ર બહેરીન જ નહીં, ઈરાને વૈશ્વિક ટુરિઝમ હબ ગણાતા દુબઈને પણ નિશાન બનાવ્યું છે. દુબઈ આંતરરાષ્ટ્રીય એરપોર્ટ પર થયેલા મિસાઈલ હુમલાના હૃદયદ્રાવક વીડિયો સોશિયલ મીડિયા પર વાયરલ થઈ રહ્યા છે, જેમાં એરપોર્ટના ઈન્ફ્રાસ્ટ્રક્ચરને વ્યાપક નુકસાન થતું જોવા મળી રહ્યું છે. સુરક્ષા સૂત્રોના જણાવ્યા અનુસાર, ઈરાનના આ આડેધડ હુમલામાં એક પાકિસ્તાની નાગરિકનું કરૂણ મોત નીપજ્યું છે, જ્યારે અનેક લોકો ઘાયલ થયા છે. દુબઈ પરના હુમલાએ સાબિત કર્યું છે કે ઈરાન હવે યુદ્ધમાં કોઈ પણ પ્રકારની મર્યાદા રાખવા તૈયાર નથી અને તેનો આક્રોશ ચરમસીમા પર છે.

સુપ્રીમ લીડરના નિધન બાદ ઈરાની સૈન્ય અને ક્રાંતિકારી ગાર્ડ્સ (IRGC) એ સોગંદ લીધા છે કે તેઓ અમેરિકી અને ઈઝરાયેલી હિતો ધરાવતા તમામ ઠેકાણાઓને રાખ કરી દેશે. મધ્ય-પૂર્વમાં સર્જાયેલી આ અરાજકતાને કારણે વૈશ્વિક શેરબજારો અને ક્રૂડ ઓઈલના ભાવમાં પણ મોટો ઉછાળો જોવા મળી રહ્યો છે. જો સંયુક્ત રાષ્ટ્ર કે અન્ય દેશો હસ્તક્ષેપ નહીં કરે, તો આ લડાઈ આવનારા દિવસોમાં ત્રીજા વિશ્વયુદ્ધનું સ્વરૂપ ધારણ કરી શકે તેવી ભીતિ સેવવામાં આવી રહી છે. હાલમાં મનામા અને દુબઈના આકાશમાં માત્ર એન્ટી-મિસાઈલ સિસ્ટમના અવાજો અને સાયરનો ગુંજી રહ્યા છે.