હૈદરાબાદ/નવી દિલ્હી:પશ્ચિમ એશિયામાં ઈરાન અને ઈઝરાયેલ વચ્ચે ફાટી નીકળેલા ભીષણ યુદ્ધ પર AIMIMના વડા અસદુદ્દીન ઓવૈસીએ અત્યંત આક્રમક પ્રતિક્રિયા આપી છે. ઓવૈસીએ ઈરાનના સર્વોચ્ચ નેતા આયાતુલ્લાહ અલી ખામેનીની હત્યાને સખત શબ્દોમાં વખોડી કાઢતા તેને 'ગેરકાયદેસર અને અનૈતિક' ગણાવી છે. તેમણે ભારપૂર્વક જણાવ્યું કે ખામેની માત્ર એક રાજકીય નેતા નહોતા, પરંતુ સમગ્ર વિશ્વના શિયા સમુદાય માટે સર્વોચ્ચ ધાર્મિક સત્તા હતા. જ્યારે જીનીવામાં પરમાણુ કરાર પર શાંતિપૂર્ણ વાટાઘાટો ચાલી રહી હતી, ત્યારે એક વૃદ્ધ ધાર્મિક નેતાને નિશાન બનાવવાનું પગલું પશ્ચિમી દેશોની બેવડી નીતિ અને અમાનવીયતાનું ઉદાહરણ હોવાનું તેમણે ઉમેર્યું હતું.

ઓવૈસીએ હુમલાની ભયાનકતા વર્ણવતા દાવો કર્યો હતો કે આ બોમ્બમારામાં 150 થી વધુ શાળાના બાળકોના કરૂણ મોત થયા છે. તેમણે પશ્ચિમી દેશોની માનવાધિકાર સંસ્થાઓ પર સવાલ ઉઠાવતા પૂછ્યું કે, "જ્યારે માસૂમ બાળકો લોહીલુહાણ થઈ રહ્યા છે ત્યારે કહેવાતી પશ્ચિમી માનવતા ક્યાં છુપાઈ ગઈ છે?" ઓવૈસીએ ચેતવણી આપી હતી કે ઈરાન જેવો મજબૂત દેશ, જે 35 વર્ષથી આંતરરાષ્ટ્રીય પ્રતિબંધો સામે અડગ ઊભો છે, તે આવા હુમલાઓ સામે ક્યારેય ઝૂકશે નહીં. આ સંઘર્ષ હવે માત્ર બે દેશો પૂરતો મર્યાદિત ન રહેતા સમગ્ર પ્રદેશને રાખ કરી શકે તેવી ભીતિ તેમણે વ્યક્ત કરી હતી.

ભારત પર પડનારી અસરો અંગે ચિંતા વ્યક્ત કરતા ઓવૈસીએ આંકડાકીય વિશ્લેષણ રજૂ કર્યું હતું. તેમણે કહ્યું કે પશ્ચિમ એશિયામાં અંદાજે 10 મિલિયન (1 કરોડ) ભારતીયો રોજગારી મેળવે છે, જેમની સુરક્ષા અત્યારે જોખમમાં છે. ભારત પોતાની જરૂરિયાતનું 80 ટકાથી વધુ તેલ આયાત કરે છે અને જો યુદ્ધને કારણે તેલના ભાવમાં માત્ર એક ડોલરનો પણ વધારો થશે, તો ભારતીય અર્થતંત્રને અબજો રૂપિયાનો ફટકો પડશે. વધુમાં, દુબઈ, ઓમાન અને સાઉદી અરેબિયાના એરપોર્ટ પર હજારો ભારતીય મુસાફરો ફસાયેલા છે, જેમના ખાવા-પીવાની અને સુરક્ષાની વ્યવસ્થા કરવી અનિવાર્ય છે.

અંતમાં, અસદુદ્દીન ઓવૈસીએ વડાપ્રધાન નરેન્દ્ર મોદીને સીધી અપીલ કરતા જણાવ્યું કે ભારતે આ વૈશ્વિક સંકટમાં મૌન રહેવાને બદલે યુદ્ધ રોકવા માટે સક્રિય રાજદ્વારી ભૂમિકા ભજવવી જોઈએ. તેમણે ભૂતકાળમાં ઈરાક, લિબિયા અને સીરિયામાં અમેરિકાના હસ્તક્ષેપથી સર્જાયેલી બરબાદીનો હવાલો આપીને કહ્યું કે, જો અત્યારે આ મહાયુદ્ધને અટકાવવામાં નહીં આવે તો તેની કિંમત સમગ્ર વિશ્વએ ચૂકવવી પડશે. ભારતનું હિત પશ્ચિમ એશિયામાં શાંતિ જળવાય રહેવામાં જ છે, કારણ કે આ પ્રદેશ ભારત માટે ઉર્જા અને આર્થિક દૃષ્ટિએ અત્યંત મહત્વપૂર્ણ કોરિડોર છે.