સહરસા/લખનૌ:બિહારના સહરસા જિલ્લાના નૌહટ્ટા નગર પંચાયત વિસ્તારમાંથી રહસ્યમય રીતે ગુમ થયેલી પાંચ સગીર છોકરીઓનો મામલો સુખદ અંત સાથે ઉકેલાઈ ગયો છે. ગત ૨૭ ફેબ્રુઆરીના રોજ સવારે ઘર નજીકના ખેતરોમાં ઘાસ કાપવા ગયેલી આ પાંચેય કિશોરીઓ સાંજ સુધી પરત ન ફરતા સમગ્ર પંથકમાં ભારે ગભરાટ અને સનસનાટી મચી ગઈ હતી. પરિવારની વ્યાપક શોધખોળ બાદ પણ કોઈ પતો ન લાગતા આખરે પોલીસનો સંપર્ક કરવામાં આવ્યો હતો. મામલાની સંવેદનશીલતા જોતા સહરસા પોલીસે તાત્કાલિક સ્પેશિયલ ઇન્વેસ્ટિગેશન ટીમ (SIT) ની રચના કરી ટેકનિકલ સર્વેલન્સ અને હ્યુમન ઇન્ટેલિજન્સના આધારે તપાસના ચક્રો ગતિમાન કર્યા હતા.

તપાસ દરમિયાન પોલીસને મહત્વની કડી મળી હતી કે આ પાંચેય છોકરીઓ રેલવે માર્ગે બિહારની બહાર નીકળી ગઈ હોઈ શકે છે. આ આશંકાને પગલે બિહાર અને ઉત્તર પ્રદેશના તમામ મુખ્ય રેલવે સ્ટેશનો પર હાઈ-એલર્ટ જાહેર કરી છોકરીઓના ફોટોગ્રાફ્સ રેલવે પ્રોટેક્શન ફોર્સ (RPF) અને જીઆરપીને મોકલવામાં આવ્યા હતા. ૨૮ ફેબ્રુઆરીની મોડી રાત્રે ઉત્તર પ્રદેશની રાજધાની લખનૌના ઐશબાગ રેલવે સ્ટેશન પર તૈનાત સતર્ક રેલવે કર્મચારીઓ અને ટીટીઈ (TTE) ની નજર આ પાંચ છોકરીઓ પર પડી હતી. શંકા જતાં તેમની પૂછપરછ કરવામાં આવી અને ફોટોગ્રાફ્સ સાથે ઓળખ મેચ થતાં જ તેમને સુરક્ષિત રીતે પોલીસ કસ્ટડીમાં લેવામાં આવી હતી.

સહરસાના ડીએસપી કે.પી. સિંહે જણાવ્યું હતું કે, પોલીસની ટીમોએ આંતરરાજ્ય સંકલન સાથે કામ કર્યું હતું, જેના પરિણામે આ પાંચેય માસૂમ જીવ સુરક્ષિત રીતે બચાવી શકાયા છે. છોકરીઓ મળી આવ્યાના સમાચાર મળતા જ સહરસા પોલીસની એક વિશેષ ટીમ લખનૌ જવા રવાના થઈ હતી, જે પાંચેય સગીરાઓને પરત બિહાર લાવશે. આ સફળ ઓપરેશન બાદ છોકરીઓના વાલીઓએ પોલીસ તંત્રનો આભાર માન્યો હતો અને બે દિવસથી ચાલી રહેલી માનસિક યાતનાનો અંત આવતા રાહતનો શ્વાસ લીધો હતો. સમગ્ર પંથકમાં પોલીસની આ કામગીરીની પ્રશંસા થઈ રહી છે.

જોકે, હજુ પણ સૌથી મોટો પ્રશ્ન એ યથાવત છે કે ઘાસ કાપવા ગયેલી આ સગીરાઓ છેક ૭૦૦ કિમી દૂર લખનૌ કેવી રીતે પહોંચી? શું આ પાછળ કોઈ મોટા માનવ તસ્કરી (Human Trafficking) રેકેટનો હાથ છે કે પછી છોકરીઓ કોઈના લાલચ કે દબાણમાં આવીને ઘર છોડીને ભાગી હતી? પોલીસ સૂત્રોના જણાવ્યા અનુસાર, છોકરીઓ સહરસા પરત ફર્યા બાદ તેમની કાઉન્સેલિંગ કરવામાં આવશે અને મેજિસ્ટ્રેટ સમક્ષ તેમના નિવેદનો નોંધવામાં આવશે, ત્યારબાદ જ આ રહસ્ય પરથી પડદો ઉચકાશે. હાલમાં રેલવે સ્ટેશનના સીસીટીવી ફૂટેજ પણ ચકાસવામાં આવી રહ્યા છે.