દુબઈ/નવી દિલ્હી:ઈરાન અને ઈઝરાયેલ વચ્ચે ફાટી નીકળેલા મહાયુદ્ધની જ્વાળાઓએ હવે વૈશ્વિક હવાઈ માર્ગોને બાનમાં લીધા છે. ભારતની સ્ટાર બેડમિન્ટન ખેલાડી પીવી સિંધુ દુબઈમાં ફસાઈ ગઈ છે અને તેણે સોશિયલ મીડિયા પર આ ભયાનક અનુભવ શેર કરતા જણાવ્યું છે કે તે જે એરપોર્ટ પર આશરો લઈ રહી હતી ત્યાં જ જોરદાર વિસ્ફોટો થયા હતા. સિંધુના જણાવ્યા અનુસાર, તેના કોચ કાટમાળ અને ધુમાડાની અત્યંત નજીક હતા, જેના કારણે સમગ્ર ટીમ ભારે તણાવમાં છે. માત્ર સિંધુ જ નહીં, પરંતુ એર ઇન્ડિયા, ઇન્ડિગો અને એર ઇન્ડિયા એક્સપ્રેસની અનેક ફ્લાઇટ્સ દુબઈ અને અન્ય અખાતી દેશોના એરપોર્ટ પર અટવાઈ ગઈ છે, જેના કારણે હજારો ભારતીય પ્રવાસીઓ હાલ રઝળી પડ્યા છે.

યુદ્ધની અસર ભારતના એરપોર્ટ પર પણ જોવા મળી રહી છે, જ્યાં દિલ્હી એરપોર્ટ પર અત્યાર સુધીમાં ૧૦૦ જેટલી ફ્લાઇટ્સ રદ કરવામાં આવી છે. મધ્ય-પૂર્વની પરિસ્થિતિ જોતા સીબીએસઈ (CBSE) એ બહેરીન, ઈરાન, સાઉદી અરેબિયા અને યુએઈ સહિતના દેશોમાં ૨ માર્ચના રોજ યોજાનારી ધોરણ ૧૦ અને ૧૨ની પરીક્ષાઓ અનિશ્ચિતકાળ માટે મુલતવી રાખી છે. બીજી તરફ, તેહરાનમાં અભ્યાસ કરતા ભારતીય મેડિકલ વિદ્યાર્થીઓએ વિદેશ મંત્રી એસ. જયશંકરને પત્ર લખીને તાત્કાલિક એરલિફ્ટ કરવાની માંગ કરી છે. વિદ્યાર્થીઓના જણાવ્યા મુજબ, કોલેજોની ઉપરથી પસાર થતી મિસાઈલો અને સતત થતા વિસ્ફોટોને કારણે તેઓ જીવના જોખમે હોસ્ટેલના બંકરોમાં ભરાઈ રહ્યા છે.

ઈરાનના સર્વોચ્ચ નેતા ખામેનીના મોત બાદ ભારતના વિવિધ શહેરોમાં પણ તેના પડઘા પડ્યા છે. અજમેર અને સંભલમાં શિયા સમુદાય દ્વારા ત્રણ દિવસનો શોક જાહેર કરવામાં આવ્યો છે અને અમેરિકા વિરોધી પ્રદર્શનો સાથે શોક સભાઓ યોજાઈ રહી છે. રાજકીય મોરચે, શિરોમણી અકાલી દળના પ્રમુખ સુખબીર સિંહ બાદલે પંજાબી યુવાનોની સુરક્ષા માટે વડાપ્રધાન મોદી સાથે મુલાકાત કરવાની જાહેરાત કરી છે. ઈરાને હવે ઓમાનના ખાસાબ બંદર નજીક તેલ ટેન્કર પર હુમલો કરતા આ યુદ્ધ હવે માત્ર બે દેશો પૂરતું મર્યાદિત ન રહેતા સમગ્ર અખાતી વિસ્તારને લપેટમાં લઈ રહ્યું હોય તેમ જણાય છે.

દુબઈ વહીવટીતંત્ર દ્વારા તમામ નાગરિકો અને પ્રવાસીઓ માટે ઈમરજન્સી એલર્ટ જારી કરવામાં આવ્યું છે, જેમાં લોકોને બારીઓ અને ખુલ્લી જગ્યાઓથી દૂર રહી સુરક્ષિત ઈમારતોમાં આશરો લેવા જણાવાયું છે. મિસાઈલ હુમલાના જોખમને પગલે તિરુવનંતપુરમ અને અન્ય આંતરરાષ્ટ્રીય એરપોર્ટ પર અખાત તરફ જતી ફ્લાઇટ્સ બંધ કરી દેવામાં આવી છે. યુદ્ધની આ ભયાનકતા વચ્ચે હવે દુબઈમાં ફસાયેલા ભારતીયોને પાછા લાવવા માટે ભારત સરકાર વિશેષ ‘રેસ્ક્યુ ફ્લાઇટ્સ’ ઓપરેટ કરે છે કે કેમ તેના પર સૌની નજર ટકેલી છે.