પટના/દુબઈ:પશ્ચિમ એશિયામાં ઈરાન અને ઈઝરાયેલ વચ્ચે ફાટી નીકળેલા ભીષણ જંગની જ્વાળાઓ હવે ખાડી દેશોમાં વસતા ભારતીયો માટે જીવનું જોખમ બની રહી છે. બિહારના મુખ્યમંત્રી નીતીશ કુમારે આ ગંભીર પરિસ્થિતિની નોંધ લેતા જેડીયુના કાર્યકારી રાષ્ટ્રીય અધ્યક્ષ અને સાંસદ સંજય ઝાને તાત્કાલિક કેન્દ્ર સરકાર સાથે સંકલન સાધવા આદેશ આપ્યો હતો. મુખ્યમંત્રીની સૂચનાના પગલે સંજય ઝાએ ભારતના વિદેશ મંત્રી ડૉ. એસ. જયશંકર સાથે ટેલિફોનિક વાતચીત કરી દુબઈ, અબુધાબી અને આસપાસના યુદ્ધગ્રસ્ત વિસ્તારોમાં ફસાયેલા હજારો બિહારી નાગરિકોની સલામતી અંગે ચિંતા વ્યક્ત કરી છે. ખાસ કરીને શ્રમિકો અને ત્યાં સ્થાયી થયેલા પરિવારો સતત બિહાર સરકારના સંપર્કમાં રહી મદદની ગુહાર લગાવી રહ્યા છે.

વિદેશ મંત્રી ડૉ. જયશંકરે જેડીયુ નેતાને ખાતરી આપી હતી કે ભારત સરકાર પશ્ચિમ એશિયાની પળેપળની પરિસ્થિતિ પર નજર રાખી રહી છે અને સંબંધિત દેશોની સરકારો સાથે સતત સંપર્કમાં છે. સંજય ઝાએ મીડિયાને જણાવ્યું કે, વિદેશ મંત્રીએ તેમને આશ્વાસન આપ્યું છે કે ભારતીય દૂતાવાસો અત્યારે યુદ્ધના ધોરણે કાર્યરત છે અને નાગરિકોની સુરક્ષા માટે તમામ શક્ય પ્રયાસો કરવામાં આવી રહ્યા છે. ખાસ કરીને દુબઈ અને અબુધાબી જેવા શહેરોમાં જ્યાં મિસાઈલ હુમલાની આશંકા છે, ત્યાં ભારતીયોને સલામત સ્થળે ખસેડવા અને તેમની જરૂરિયાતો પૂરી કરવા માટે વિદેશ મંત્રાલયે વિશેષ ટાસ્ક ફોર્સ તૈનાત કરી છે.

યુએસ-ઈઝરાયેલી હવાઈ હુમલામાં ઈરાનના સુપ્રીમ લીડર આયાતુલ્લાહ અલી ખામેનીના મોત બાદ સમગ્ર અખાતી દેશોમાં ભારે આક્રોશ અને હિંસક વિરોધ પ્રદર્શનો ચાલી રહ્યા છે. આ અસ્થિરતા વચ્ચે બિહારના શ્રમિકો કે જેઓ મોટાભાગે બાંધકામ અને અન્ય ક્ષેત્રોમાં કાર્યરત છે, તેઓ સૌથી વધુ પ્રભાવિત થયા છે. સંજય ઝાએ ફસાયેલા તમામ રહેવાસીઓને અપીલ કરી છે કે જ્યાં સુધી પરિસ્થિતિ સામાન્ય ન થાય ત્યાં સુધી તેઓ ઘરની બહાર ન નીકળે અને સ્થાનિક સરકાર તેમજ ભારતીય દૂતાવાસ દ્વારા જારી કરવામાં આવતી સત્તાવાર એડવાઈઝરીનું ચુસ્તપણે પાલન કરે. તેમણે ઉમેર્યું કે ભારત સરકાર પરિસ્થિતિ સામાન્ય થતા જ જરૂરી રેસ્ક્યુ ઓપરેશન શરૂ કરશે.

બિહાર સરકારના આ સક્રિય અભિગમથી ખાડી દેશોમાં ફસાયેલા બિહારી પરિવારોમાં આશાનું કિરણ જાગ્યું છે. રાજ્ય સરકાર દ્વારા પટનામાં પણ એક વિશેષ સેલની રચના કરવામાં આવી શકે છે જે વિદેશમાં ફસાયેલા લોકોના ડેટા એકત્રિત કરશે. હાલમાં પશ્ચિમ એશિયામાં ફ્લાઇટ્સ રદ થવાને કારણે મુસાફરો એરપોર્ટ પર અટવાયા છે, ત્યારે સંજય ઝાએ વિદેશ મંત્રીને વિનંતી કરી છે કે જે લોકોના વિઝા એક્સપાયર થઈ રહ્યા છે અથવા જેમને તબીબી સહાયની જરૂર છે તેમને પ્રાથમિકતા આપવામાં આવે. આગામી દિવસોમાં આ યુદ્ધ કઈ દિશામાં વળે છે તેના પર બિહારના લાખો લોકોના ભાવિનો આધાર રહેલો છે.