મુંબઈ/દુબઈ:પશ્ચિમ એશિયામાં અમેરિકા, ઈરાન અને ઈઝરાયેલ વચ્ચે ફાટી નીકળેલા ભીષણ જંગની અસર હવે બોલીવુડની હસ્તીઓ પર પણ જોવા મળી રહી છે. વિવાદોમાં રહેતા અભિનેતા અને વિવેચક કેઆરકે (કમાલ આર. ખાન) એ ઈન્સ્ટાગ્રામ પર એક હૃદયદ્રાવક પોસ્ટ શેર કરીને ખુલાસો કર્યો છે કે તેનો પરિવાર હાલમાં દુબઈમાં ફસાયેલો છે. દુબઈના આકાશમાં મિસાઈલ ઈન્ટરસેપ્શન અને સતત થતા વિસ્ફોટોને કારણે કેઆરકે ભારે ચિંતામાં મુકાયો છે. તેણે પોતાની પત્ની અને બંને બાળકોનો ફોટો શેર કરીને ભગવાનને તેમને સુરક્ષિત રાખવા માટે કરગરતી વિનંતી કરી છે, જે પોસ્ટ અત્યારે ઇન્ટરનેટ પર ભારે વાયરલ થઈ રહી છે.

કેઆરકે દ્વારા શેર કરવામાં આવેલી આ પોસ્ટમાં તેની પત્ની આયેશા (અનિતા કુમાર), પુત્રી અને પુત્ર જોવા મળી રહ્યા છે. અભિનેતાએ કેપ્શનમાં લખ્યું છે કે, "મારી પત્ની અને બાળકો રમઝાનના પવિત્ર માસ માટે દુબઈમાં છે. ભગવાન તેમને સુરક્ષિત રાખે." યુદ્ધના કારણે દુબઈ અને શારજાહના એરપોર્ટ બંધ કરી દેવામાં આવ્યા હોવાથી અને હવાઈ સેવાઓ સંપૂર્ણપણે ઠપ્પ થઈ ગઈ હોવાથી તેનો પરિવાર ભારત પરત ફરી શકે તેવી સ્થિતિમાં નથી. આ અનિશ્ચિતતા અને ભયના ઓથાર નીચે કેઆરકેના ચાહકો પણ તેના પરિવારની સલામતી માટે પ્રાર્થના કરી રહ્યા છે.

ઉલ્લેખનીય છે કે, કમાલ આર. ખાન પોતાની પત્ની અનિતા (આયેશા) ને પોતાના જીવનનો સૌથી મોટો સપોર્ટ માને છે. તેણે અગાઉ પણ સોશિયલ મીડિયા પર જણાવ્યું હતું કે તેની પત્ની ખૂબ જ શિક્ષિત છે અને તેના કારણે જ તેના બાળકો ઉચ્ચ અભ્યાસ કરી રહ્યા છે. અત્યારે જ્યારે મધ્ય-પૂર્વમાં અરાજકતા ફેલાયેલી છે અને અનેક ગલ્ફ દેશો પર ઈરાની ડ્રોન ત્રાટકી રહ્યા છે, ત્યારે કેઆરકે જેવા સેલિબ્રિટીઝની લાચારી સામે આવી રહી છે. દુબઈમાં સતત વાગતા સાયરન અને યુદ્ધના વીડિયો જોઈને મુંબઈમાં બેઠેલા કેઆરકેના જીવ અધ્ધર થઈ ગયા છે.

માત્ર કેઆરકે જ નહીં, પરંતુ બોલીવુડના અન્ય કલાકારો પણ દુબઈમાં ફસાયેલા હોવાના અહેવાલો છે. ભારત સરકાર અત્યારે અખાતી દેશોમાં રહેલા તમામ ભારતીય નાગરિકોની સુરક્ષા માટે ચિંતિત છે અને સતત દૂતાવાસના સંપર્કમાં છે. જોકે, યુદ્ધની સ્થિતિ ક્યારે થાળે પડશે તે કહેવું મુશ્કેલ છે. ગ્લેમર જગતના આ સિતારા અત્યારે કોઈ શૂટિંગ કે ફિલ્મની નહીં, પરંતુ માત્ર પોતાના સ્વજનોના જીવ બચાવવાની પ્રાર્થના કરી રહ્યા છે. આ ઘટનાએ સાબિત કરી દીધું છે કે યુદ્ધની આગમાં ગરીબ હોય કે અમીર, સામાન્ય માણસ હોય કે સેલિબ્રિટી, કોઈ પણ સુરક્ષિત નથી.