નવી દિલ્હી:  ટેકનોલોજીની દુનિયામાં ક્યારેક વિવાદ જ વિકાસનું સોપાન બની જતો હોય છે, અને એન્થ્રોપિકની 'ક્લાઉડ'  એઆઈ એપ તેનું જીવતું જાગતું ઉદાહરણ બની છે. યુએસ પ્રમુખ ડોનાલ્ડ ટ્રમ્પ અને વોશિંગ્ટનના રાજકીય વર્તુળો સાથેના ઘર્ષણ બાદ, એન્થ્રોપિક એપની લોકપ્રિયતામાં એવો ઉછાળો આવ્યો છે કે તેણે દિગ્ગજ એપ્સને પાછળ છોડી દીધી છે. શનિવારે સાંજે એપલના એપ સ્ટોર પર ક્લાઉડ એપ સીધી જ નંબર 1 ના સ્થાન પર બિરાજમાન થઈ ગઈ હતી. એન્થ્રોપિકના સીઈઓ ડારિયો અમોડેઈ, જેઓ તાજેતરમાં નવી દિલ્હીમાં 'AI ઇમ્પેક્ટ સમિટ 2026' માં હાજર રહ્યા હતા, તેમના માટે આ એક મોટી વ્યૂહાત્મક જીત સમાન છે, કારણ કે તેમની કંપની અત્યારે વૈશ્વિક સ્તરે ચર્ચાનું કેન્દ્ર બની છે.

આ અચાનક આવેલા ઉછાળા પાછળનું મુખ્ય કારણ અમેરિકાના સંરક્ષણ વિભાગ (પેન્ટાગોન) અને વ્હાઇટ હાઉસ સાથેનો વિવાદ માનવામાં આવે છે. જાન્યુઆરીના અંત સુધી જે એપ ટોપ-100 ની યાદીમાં પણ નહોતી, તે ફેબ્રુઆરીમાં પેન્ટાગોન સાથેના AI ડિપ્લોયમેન્ટ વિવાદ બાદ સીધી ટોપ-20 માં પ્રવેશી હતી. ડારિયો અમોડેઈને વોશિંગ્ટનમાં સાઈડલાઈન કરવામાં આવતા ટેક-પ્રેમીઓ અને સામાન્ય જનતામાં તેમના પ્લેટફોર્મ પ્રત્યે ભારે ઉત્સુકતા જાગી હતી. ટ્રમ્પ વહીવટીતંત્રના કડક વલણ અને પ્રતિબંધોએ જાણે ક્લાઉડ એપ માટે મફત જાહેરાતનું કામ કર્યું હોય તેમ, લાખો લોકોએ તેને ડાઉનલોડ કરવાનું શરૂ કરી દીધું છે.

વપરાશકર્તાઓની બદલાતી પસંદગી સૂચવે છે કે હવે લોકો માત્ર ChatGPT સુધી સીમિત રહેવા માંગતા નથી, પરંતુ નવા અને વધુ સચોટ AI સાધનોને અજમાવવા આતુર છે. એન્થ્રોપિકની ક્લાઉડ એપની સફળતા એ વાતનો પુરાવો છે કે ભલે વોશિંગ્ટનમાં રાજકીય અવરોધો હોય, પરંતુ વૈશ્વિક બજારમાં જનતાનો પ્રતિસાદ જ સર્વોપરી છે. એક તરફ જ્યાં વોશિંગ્ટનમાં ટેક કંપનીઓ વચ્ચે લોબિંગની લડાઈ ચાલી રહી છે, બીજી તરફ એન્થ્રોપિકે સીધો જ સ્માર્ટફોન યુઝર્સના દિલમાં અને એપ સ્ટોરના ચાર્ટમાં ટોચનું સ્થાન મેળવીને પોતાની તાકાત બતાવી દીધી છે.