નવી દિલ્હી :કેન્દ્ર સરકારની વન નેશન, વન કાર્ડ પહેલમાંથી પ્રેરણા લઈને, દિલ્હીમાં રેખા ગુપ્તા સરકાર રાજધાનીની મહિલા રહેવાસીઓ માટે નેશનલ કોમન મોબિલિટી કાર્ડ (NCMC) લોન્ચ કરી રહી છે. મહામહિમ રાષ્ટ્રપતિ દ્રૌપદી મુર્મુ સોમવારના રોજ ઇન્દિરા ગાંધી ઇન્ડોર સ્ટેડિયમ ખાતે "સશક્ત નારી સમૃદ્ધ દિલ્હી" નામના એક ખાસ અને ભવ્ય કાર્યક્રમમાં આ મહત્વાકાંક્ષી યોજના (પિંક કાર્ડ) લોન્ચ કરશે

  મુખ્યમંત્રી રેખા ગુપ્તાએ જણાવ્યું હતું કે આ કાર્ડ દિલ્હીની મહિલા રહેવાસીઓને DTC બસોમાં મફત મુસાફરી તેમજ મેટ્રો, રિજનલ રેપિડ ટ્રાન્ઝિટ સિસ્ટમ (RRTS) અને અન્ય જાહેર પરિવહન સેવાઓમાં એક જ સ્માર્ટ કાર્ડ દ્વારા ચૂકવણી કરીને મુસાફરી કરવાની સુવિધા આપશે.

   મુખ્યમંત્રીએ જણાવ્યું કે આ યોજના હેઠળ ત્રણ પ્રકારના NCMC કાર્ડ જારી કરવામાં આવશે. પિંક કાર્ડ દિલ્હીની લાયક મહિલા રહેવાસીઓ માટે હશે, જ્યારે બ્લુ કાર્ડ સામાન્ય મુસાફરોને અને નારંગી કાર્ડ માસિક પાસ ધારકોને આપવામાં આવશે. શરૂઆતમાં પિંક અને બ્લુ કાર્ડ શરૂ કરવામાં આવશે, ત્યારબાદ નારંગી કાર્ડ.

    તેમણે માહિતી આપી હતી કે દિલ્હી ટ્રાન્સપોર્ટ કોર્પોરેશન (DTC) એ હિંડન મર્કેન્ટાઇલ લિમિટેડ (MufinPay) અને એરટેલ પેમેન્ટ્સ બેંક લિમિટેડને કાર્ડ જારી કરવા માટે અધિકૃત કર્યા છે. આ કાર્ડ દિલ્હીની જાહેર પરિવહન વ્યવસ્થામાં પહેલાથી જ કાર્યરત ઓટોમેટિક ફેર કલેક્શન સિસ્ટમ (AFCS) સાથે સંકલિત કરવામાં આવશે. પિંક કાર્ડ પાત્ર મહિલાઓને સંપૂર્ણપણે મફતમાં આપવામાં આવશે, અને સમગ્ર ખર્ચ દિલ્હી સરકાર દ્વારા ઉઠાવવામાં આવશે. 

  મુખ્યમંત્રીના જણાવ્યા મુજબ, કાર્ડ જારી કરવા માટે આશરે 50 કેન્દ્રો સ્થાપિત કરવામાં આવશે, જેમાં જિલ્લા મેજિસ્ટ્રેટ (DM) અને SDM ઓફિસો તેમજ પસંદગીના DTC કેન્દ્રોનો સમાવેશ થાય છે. આ કાર્ડ જારી ઓછામાં ઓછા દસ્તાવેજો સાથે કરવામાં આવશે, જે સરળ, ઝડપી અને પારદર્શક પ્રક્રિયા સુનિશ્ચિત કરશે. દરેક પિંક કાર્ડ લાભાર્થીના મોબાઇલ નંબર અને આધાર સાથે લિંક કરવામાં આવશે. આધાર દ્વારા પ્રમાણીકરણ વય (5 વર્ષથી વધુ), લિંગ (સ્ત્રી) અને દિલ્હી નિવાસ (દિલ્હી પિન કોડના આધારે) ચકાસશે, પાત્રતા સુનિશ્ચિત કરશે અને ડુપ્લિકેશન અટકાવશે.