દુબઈ: આંતરરાષ્ટ્રીય મુસાફરોનું સૌથી મોટું કેન્દ્ર અને દુનિયાનું સૌથી વ્યસ્ત એરપોર્ટ ગણાતું દુબઈ ઇન્ટરનેશનલ (DXB) અત્યારે એક એવા પ્રશ્ન સામે ઝઝૂમી રહ્યું છે જેનો ઉકેલ કોઈની પાસે નથી: "ફ્લાઇટ્સ ફરી ક્યારે શરૂ થશે?" ઈરાન-ઈઝરાયલ સંઘર્ષ અને અમેરિકાના હસ્તક્ષેપ બાદ સર્જાયેલી યુદ્ધ જેવી સ્થિતિને કારણે દુબઈના બંને મુખ્ય એરપોર્ટ (DXB અને DWC) પર તમામ કામગીરી "આગળની સૂચના સુધી" સ્થગિત કરી દેવામાં આવી છે.
ક્યારે મળશે લીલી ઝંડી?
એરપોર્ટ સત્તાવાળાઓ અને જનરલ સિવિલ એવિએશન ઓથોરિટી (GCAA) એ સ્પષ્ટ કર્યું છે કે એરપોર્ટ ફરીથી ખોલવા માટે કોઈ ચોક્કસ તારીખ કે સમય નક્કી કરવામાં આવ્યો નથી. અધિકારીઓ દર મિનિટે પ્રાદેશિક સુરક્ષાની સ્થિતિનું મૂલ્યાંકન કરી રહ્યા છે. જ્યાં સુધી ખાડી દેશોનું આકાશ મિસાઈલો અને યુદ્ધ વિમાનોના જોખમથી મુક્ત નહીં થાય, ત્યાં સુધી મુસાફરોને આકાશમાં ઉડવાની પરવાનગી નહીં મળે.
મુસાફરો માટે ખાસ ચેતવણી
દુબઈ એરપોર્ટ્સે મુસાફરોને કડક શબ્દોમાં વિનંતી કરી છે કે:
•    એરપોર્ટ પર ન આવો: ટર્મિનલ્સ પર ભીડ ટાળવા માટે મુસાફરોને ઘરે જ રહેવા કહેવામાં આવ્યું છે.
•    એરલાઇન્સનો સંપર્ક: રિબુકિંગ, રિફંડ કે ફ્લાઇટ કેન્સલેશન માટે સીધો એરલાઇનનો જ સંપર્ક કરો.
•    સત્તાવાર ચેનલ્સ: અફવાઓ પર વિશ્વાસ કરવાને બદલે એરપોર્ટના સત્તાવાર એક્સ (X) હેન્ડલ અથવા વેબસાઇટ પર નજર રાખો.
અટવાયેલા મુસાફરોની વહારે UAE સરકાર
ભલે એરપોર્ટ બંધ છે, પરંતુ UAE સરકારે માનવતાનું ઉત્તમ ઉદાહરણ પૂરું પાડ્યું છે. ટ્રાન્ઝિટમાં ફસાયેલા અંદાજે 20,200 મુસાફરોને રહેવા માટે હોટલ, ભોજન અને નાસ્તાની મફત સુવિધા પૂરી પાડવામાં આવી રહી છે. ટર્મિનલ્સ પર ભીડ ઓછી કરવા માટે ફ્લાઇટ્સનું રૂટ બદલવા અને કટોકટી પ્રતિભાવ ટીમોને તૈનાત કરવા જેવા સંકલિત પગલાં લેવામાં આવ્યા છે.
સમગ્ર પ્રદેશમાં 'નો-ફ્લાય ઝોન'
માત્ર દુબઈ જ નહીં, પરંતુ અબુ ધાબીનું ઝાયેદ ઇન્ટરનેશનલ અને શારજાહ એરપોર્ટ પણ અત્યારે સંપૂર્ણપણે બંધ છે. ગલ્ફના અનેક રાજ્યોએ સાવચેતીના ભાગરૂપે પોતાના હવાઈ ક્ષેત્ર પર પ્રતિબંધો લાદ્યા છે. GCAA અત્યારે તમામ એરલાઇન્સ સાથે મળીને એવી યોજના બનાવી રહી છે કે જેથી જેવી સુરક્ષા મંજૂરી મળે કે તરત જ અટવાયેલા મુસાફરોને તેમના ગંતવ્ય સ્થાને પહોંચાડી શકાય.