નવી દિલ્હી/મુંબઈ | તા. 03: ઈરાન, અમેરિકા અને ઈઝરાયલ વચ્ચે વધી રહેલા ભૌગોલિક-રાજકીય તણાવની સીધી અસર હવે સામાન્ય મુસાફરોના ખિસ્સા પર પડી રહી છે. ગલ્ફ દેશોના આકાશમાં સર્જાયેલી અસ્થિરતાને કારણે ભારતથી વિદેશ જતી ફ્લાઇટ્સના રૂટ બદલવા પડ્યા છે અથવા ફ્લાઇટ્સ રદ થઈ રહી છે. આ કટોકટીને પરિણામે આંતરરાષ્ટ્રીય હવાઈ ભાડામાં એટલો મોટો ઉછાળો આવ્યો છે કે સામાન્ય મધ્યમ વર્ગના મુસાફરો માટે વિદેશ પ્રવાસ હવે એક સ્વપ્ન સમાન બની રહ્યો છે.
ભાડામાં અકલ્પનીય વધારો
ટાઈમ્સ ઓફ ઈન્ડિયાના અહેવાલ મુજબ, સૌથી વધુ અસર લંડન-મુંબઈ રૂટ પર જોવા મળી છે. સામાન્ય રીતે જે રૂટ પર ઇકોનોમી ક્લાસનું ભાડું ₹20,000 થી ₹40,000 ની વચ્ચે હોય છે, ત્યાં અત્યારે મુસાફરોએ એકતરફી મુસાફરી માટે ₹2.9 લાખ સુધી ચૂકવવા પડી રહ્યા છે. એટલું જ નહીં, આ જ રૂટ પર બિઝનેસ ક્લાસની ટિકિટનો ભાવ ₹9 લાખની આસપાસ પહોંચી ગયો છે. એરલાઇન્સે જણાવ્યું છે કે ગલ્ફ એરસ્પેસ ટાળવા માટે લાંબા વૈકલ્પિક રસ્તાઓ લેવા પડતા હોવાથી ઇંધણનો વપરાશ વધ્યો છે, જેની સીધી અસર ભાડા પર પડી રહી છે.
હૈદરાબાદ અને દક્ષિણ ભારતની હાલત કફોડી
હૈદરાબાદથી લંડન અને ફ્રેન્કફર્ટ જતી ફ્લાઇટ્સમાં ૨૦૦% થી ૩૦૦% સુધીનો વધારો નોંધાયો છે. ટ્રાવેલ એજન્ટોના જણાવ્યા અનુસાર, હૈદરાબાદથી ન્યૂ યોર્ક જતી ટિકિટો હવે ₹1.5 લાખથી ઓછી કિંમતે મળવી મુશ્કેલ બની ગઈ છે. યુએઈ અને હૈદરાબાદ વચ્ચેની કનેક્ટિવિટી ખોરવાતા દરરોજ મુસાફરી કરતા અંદાજે 5,000 મુસાફરો અટવાયા છે. એકલા સોમવારે જ રાજીવ ગાંધી આંતરરાષ્ટ્રીય એરપોર્ટ પરથી 50 થી વધુ ફ્લાઇટ્સ રદ કરવામાં આવી હતી.
ભારતીયો ફસાયા, એરલાઇન્સની રાહત કામગીરી
ગલ્ફ દેશોમાં હાલમાં 20,000 થી વધુ ભારતીયો ફસાયેલા હોવાનો અંદાજ છે. આ સ્થિતિમાં એર ઇન્ડિયા અને ઇન્ડિગો જેવી ભારતીય એરલાઇન્સ ખાસ ફ્લાઇટ્સ ચલાવી રહી છે. તાજેતરમાં એર ઇન્ડિયાએ દુબઈથી 149 મુસાફરોને સુરક્ષિત રીતે દિલ્હી પહોંચાડ્યા હતા. બીજી તરફ, એમિરેટ્સ અને એતિહાદ જેવી ગલ્ફ એરલાઇન્સે પણ મર્યાદિત ધોરણે કામગીરી શરૂ કરી છે, પરંતુ માંગ એટલી વધારે છે કે પુરવઠો ઓછો પડી રહ્યો છે.
DGCA ની કડક સૂચના
ભારતના નાગરિક ઉડ્ડયન મહાનિર્દેશાલય (DGCA) એ તમામ ભારતીય એરલાઇન્સને સલાહ આપી છે કે તેઓ ઓમાન અને સાઉદી અરેબિયા જેવા સુરક્ષિત એરસ્પેસનો ઉપયોગ કરીને પોતાની સેવાઓ ફરી શરૂ કરે. જોકે, હજુ પણ અનિશ્ચિતતાનો માહોલ હોવાથી આગામી દિવસોમાં ભાડામાં ઘટાડો થવાની શક્યતા ઓછી દેખાઈ રહી છે. કોલકાતા એરપોર્ટ પરથી પણ ગલ્ફ-આધારિત કેરિયર્સે બે દિવસમાં 20 જેટલી ફ્લાઇટ્સ રદ કરતા પૂર્વ ભારતનો સંપર્ક પણ વૈશ્વિક સ્તરે ખોરવાયો છે.