દુબઈ/દોહા | તા. 03: ગલ્ફ ક્ષેત્રમાં વધી રહેલી ભૌગોલિક-રાજકીય અસ્થિરતા અને સુરક્ષાના જોખમોને ધ્યાનમાં રાખીને અગ્રણી એરલાઇન્સે તેમની ફ્લાઇટ કામગીરી પરના પ્રતિબંધો વધુ લંબાવવાની જાહેરાત કરી છે. એતિહાદ, કતાર એરવેઝ અને ગલ્ફ એર જેવી મોટી કંપનીઓએ સ્પષ્ટ કર્યું છે કે પ્રાદેશિક હવાઈ ક્ષેત્ર (Airspace) બંધ હોવાને કારણે હાલમાં સામાન્ય મુસાફરો માટે સેવાઓ શરૂ કરવી જોખમી છે. આ નિર્ણયને કારણે ભારત અને યુરોપ વચ્ચે મુસાફરી કરતા હજારો પ્રવાસીઓ મધ્ય પૂર્વના એરપોર્ટ્સ પર અટવાયા છે.
એતિહાદ અને કતાર એરવેઝનું કડક વલણ
એતિહાદ એરવેઝે સત્તાવાર નિવેદનમાં જણાવ્યું છે કે અબુ ધાબીથી આવતી અને જતી તમામ સુનિશ્ચિત વાણિજ્યિક ફ્લાઇટ્સ બુધવાર, 4 માર્ચના રોજ બપોરે 2:00 વાગ્યા સુધી સ્થગિત રહેશે. એરલાઇને મુસાફરોને વિનંતી કરી છે કે જ્યાં સુધી તેમનો સીધો સંપર્ક કરવામાં ન આવે ત્યાં સુધી એરપોર્ટ પર પહોંચવાની ઉતાવળ ન કરવી. બીજી તરફ, કતાર એરવેઝે પણ દોહા એરસ્પેસ બંધ હોવાને કારણે તેની તમામ સેવાઓ અસ્થાયી રૂપે થંભાવી દીધી છે અને આગામી અપડેટ 4 માર્ચના રોજ વહેલી સવારે આપવાની જાહેરાત કરી છે.
રિબુકિંગ અને રિફંડની સુવિધા
જે મુસાફરોએ 28 ફેબ્રુઆરી સુધીમાં ટિકિટ બુક કરાવી હતી અને જેમની મુસાફરી 7 માર્ચ સુધીની હતી, તેમને એતિહાદ એરવેઝ દ્વારા 18 માર્ચ સુધી મફત રિબુકિંગ કરવાની સુવિધા આપવામાં આવી છે. આ ઉપરાંત, જેઓ મુસાફરી રદ કરવા માંગે છે તેમને સંપૂર્ણ રિફંડની પણ ખાતરી આપવામાં આવી છે. એર અરેબિયાએ પણ લેબનોન, જોર્ડન અને ઇરાક જેવા દેશોની ફ્લાઇટ્સ 5 માર્ચ સુધી મોકૂફ રાખી છે.
ખાસ મંજૂરી હેઠળ 'રિપેટ્રિએશન' ફ્લાઇટ્સ
જોકે સામાન્ય સેવાઓ બંધ છે, પરંતુ માનવીય અભિગમ સાથે કેટલીક ખાસ ફ્લાઇટ્સ ઓપરેટ થઈ શકે છે. એરલાઇન્સે સંકેત આપ્યા છે કે કાર્ગો અને ફસાયેલા લોકોને પરત લાવવા માટે (Repatriation) ખાસ ફ્લાઇટ્સ યુએઈ સત્તાવાળાઓની કડક મંજૂરી અને સુરક્ષા તપાસ બાદ ચલાવવામાં આવી શકે છે.
ગલ્ફ દેશોના સિવિલ એવિએશન ઓથોરિટી દ્વારા આકાશ ફરી સુરક્ષિત હોવાની પુષ્ટિ કર્યા પછી જ આંતરરાષ્ટ્રીય રૂટ્સ પર વિમાનો ફરી ગુંજતા થશે. ત્યાં સુધી મુસાફરોને એરલાઇન્સની સત્તાવાર વેબસાઇટ અને મોબાઇલ એપ્લિકેશન પર નજર રાખવા સૂચના આપવામાં આવી છે.