મનામા (બહેરીન) | તા. 03: ઈરાન અને ઈઝરાયલ વચ્ચે ફાટી નીકળેલા ભીષણ યુદ્ધની અસરો હવે વહીવટી સેવાઓ પર પણ જોવા મળી રહી છે. બહેરીનમાં સ્થિત ભારતીય દૂતાવાસે પ્રવર્તમાન ગંભીર પ્રાદેશિક પરિસ્થિતિને ધ્યાનમાં રાખીને એક મોટો નિર્ણય લીધો છે. દૂતાવાસે જાહેરાત કરી છે કે બહેરીન મોલ ખાતે આવેલા ICAC સેન્ટર પર પૂરી પાડવામાં આવતી ભારતીય વિઝા અને પાસપોર્ટ સેવાઓ આગામી સૂચના સુધી તાત્કાલિક અસરથી સ્થગિત કરવામાં આવી છે.
સુરક્ષાના કારણોસર લેવાયો નિર્ણય
સોશિયલ મીડિયા પ્લેટફોર્મ 'X' પર જારી કરાયેલી સત્તાવાર એડવાઈઝરી મુજબ, આ સેવાઓ ક્યારે ફરી શરૂ થશે તે અંગે હાલ કોઈ ચોક્કસ સમયમર્યાદા આપવામાં આવી નથી. અમેરિકા અને ઈઝરાયલ દ્વારા ઈરાન પર કરાયેલા સંયુક્ત હુમલા બાદ સમગ્ર પશ્ચિમ એશિયામાં તણાવ ચરમસીમાએ છે. આ સંજોગોમાં ભારતીય મિશનોએ નાગરિકોની સુરક્ષાને સર્વોપરી ગણીને આ વહીવટી કામગીરી થંભાવી દીધી છે.
ભારતીય નાગરિકો માટે મહત્વની સૂચના
દૂતાવાસે બહેરીનમાં વસતા લાખો ભારતીયોને વિનંતી કરી છે કે તેઓ કોઈ પણ અફવાઓ પર ધ્યાન ન આપે અને માત્ર સત્તાવાર સંચાર ચેનલો દ્વારા આપવામાં આવતા અપડેટ્સ પર જ ભરોસો કરે. ભારતીય નાગરિકોને સ્થાનિક સુરક્ષા માર્ગદર્શિકાનું કડક પાલન કરવા અને બિનજરૂરી પ્રવાસ ટાળવા માટે પણ સૂચના આપવામાં આવી છે.
24x7 ઈમરજન્સી હેલ્પલાઇન શરૂ
કોઈપણ કટોકટીની સ્થિતિમાં સહાય મેળવવા માટે બહેરીનમાં ભારતીય દૂતાવાસે ખાસ હેલ્પલાઇન નંબર જારી કર્યો છે. ભારતીય નાગરિકો કોઈપણ સમયે 00973-39418071 પર સંપર્ક કરી શકે છે. આ ઉપરાંત, પશ્ચિમ એશિયાના અન્ય દેશોમાં પણ ભારતીય દૂતાવાસો એલર્ટ મોડ પર છે અને સતત પરિસ્થિતિનું નિરીક્ષણ કરી રહ્યા છે.
વિશ્વભરમાં ફ્લાઇટ્સ રદ થવા અને એરસ્પેસ બંધ થવાના બનાવો વચ્ચે વિઝા સેવાઓ બંધ થતા પ્રવાસીઓની મુશ્કેલીમાં વધારો થયો છે, પરંતુ દૂતાવાસે સ્પષ્ટ કર્યું છે કે નાગરિકોની સલામતી એ જ અત્યારે સૌથી મોટી પ્રાથમિકતા છે.