મુંબઈ: મધ્ય પૂર્વમાં ચાલી રહેલા ભીષણ સંઘર્ષની વચ્ચે મંગળવારે આકાશમાં એક અત્યંત દિલધડક ઘટના બની હતી. મુંબઈથી દુબઈ જઈ રહેલી એમિરેટ્સની ફ્લાઇટ EK501 ના મુસાફરોના જીવ ત્યારે અધ્ધર થઈ ગયા જ્યારે વિમાનને અધવચ્ચે જ 'મિસાઇલ એલર્ટ' મળ્યું. ઈરાન દ્વારા છોડવામાં આવેલી બેલિસ્ટિક મિસાઇલો અને તેના વળતા પ્રહારમાં UAE ના સંરક્ષણ દળો સક્રિય થતા, આ વિમાન મિસાઇલના સીધા રસ્તામાં આવી ગયું હતું.
હવામાં પાયલોટની કરામત: 'ડબલ રિવર્સ'નો દુર્લભ દાવ
Flightradar24 ના ડેટા મુજબ, જ્યારે વિમાન UAE ના હવાઈ ક્ષેત્રમાં પ્રવેશવાની તૈયારીમાં હતું, ત્યારે જ સંરક્ષણ મંત્રાલય તરફથી ભયજનક ચેતવણી મળી. મિસાઇલના ખતરાને ટાળવા માટે પાયલોટે હવામાં જ અત્યંત જોખમી ગણાતું 'ડબલ રિવર્સ' (બે વાર યુ-ટર્ન) લીધું હતું. એક સમયે એવું લાગ્યું કે પ્લેન મુંબઈ પાછું ફરી જશે, પરંતુ પાયલોટે અત્યંત સૂઝબૂઝથી જોખમ ટાળીને આખરે વિમાનને સુરક્ષિત રાખ્યું. આ ગૂંચવણભરી મૂવમેન્ટને એર ટ્રાફિક કંટ્રોલ (ATC) ના ઈતિહાસમાં 'અત્યંત દુર્લભ' ગણાવવામાં આવી રહી છે.
ભારતીય એરલાઇન્સ ફરી એક્શનમાં: સ્પાઇસજેટ અને અકાસાની જાહેરાત
યુદ્ધના તણાવ વચ્ચે ફસાયેલા ભારતીયો માટે રાહતના સમાચાર એ છે કે ઘણી એરલાઇન્સે મંગળવારથી પોતાની સેવાઓ આંશિક રીતે શરૂ કરી દીધી છે.
•    સ્પાઇસજેટ: આજથી ફુજૈરાહથી દિલ્હી, કોચી અને મુંબઈ માટે ખાસ ફ્લાઇટ્સ ચલાવશે. 4 માર્ચથી નિયમિત સેવાઓ પૂર્વવત થશે.
•    અકાસા એર: મુંબઈ અને જેદ્દાહ વચ્ચેની નિયમિત ફ્લાઇટ્સ આજથી જ શરૂ કરી દીધી છે. જોકે, દોહા, કુવૈત અને રિયાધની સેવાઓ 4 માર્ચ સુધી સ્થગિત રહેશે.
•    ઇન્ડિગો: અગાઉથી બુકિંગ ધરાવતા મુસાફરો માટે જેદ્દાહથી મુંબઈ અને અમદાવાદ માટે ખાસ ફ્લાઇટ્સ ઓપરેટ કરી રહી છે.
એર ઇન્ડિયાનું 'ગ્લોબલ કનેક્શન' ફરી ધબકતું થયું
એર ઇન્ડિયાએ પણ જાહેરાત કરી છે કે અમેરિકા, કેનેડા, યુરોપ અને યુકે માટેની તેની તમામ આંતરરાષ્ટ્રીય ફ્લાઇટ્સ આજથી રાબેતા મુજબ શરૂ થઈ ગઈ છે. જોકે, પશ્ચિમ એશિયા (ગલ્ફ દેશો) ના કેટલાક જોખમી રૂટ પરની ફ્લાઇટ્સ આજે અડધી રાત સુધી રદ રાખવામાં આવી છે. એર ઇન્ડિયા એક્સપ્રેસે મસ્કતથી ભારતની ફ્લાઇટ્સ શરૂ કરીને ફસાયેલા પ્રવાસીઓને મોટી રાહત આપી છે.
યુદ્ધના ધમધમાટ વચ્ચે આકાશમાં મિસાઇલથી બચીને સુરક્ષિત ઉતરાણ કરનાર મુસાફરો માટે આ સફર કોઈ ચમત્કારથી ઓછી નહોતી. ભારત સરકાર અને નાગરિક ઉડ્ડયન મંત્રાલય પરિસ્થિતિ પર સતત નજર રાખી રહ્યા છે.