રાંચી: ઝારખંડની રાજધાની રાંચીને અડીને આવેલા રતુ પોલીસ સ્ટેશન વિસ્તારમાં સોમવારે એક હાથીએ ભારે આતંક મચાવ્યો હતો. આ ઘટનામાં એક વ્યક્તિનું કચડી નાખવાથી કરુણ મોત નીપજ્યું છે, જ્યારે અન્ય બે લોકો ગંભીર રીતે ઘાયલ થયા છે. રતુના ચિત્રકોટા બરકા ટોલીમાં બનેલી આ ઘટનાએ સમગ્ર પંથકમાં ફફડાટ ફેલાવી દીધો છે.
નશામાં ભાન ભૂલેલા યુવકનો કરુણ અંત
પ્રત્યક્ષદર્શીઓના જણાવ્યા અનુસાર, સોમવારે સવારે 5 વાગ્યાની આસપાસ એક વિશાળકાય હાથી ગામમાં ઘૂસી આવ્યો હતો. ગામના લોકો ડરના માર્યા સુરક્ષિત જગ્યાએ છુપાઈ ગયા હતા, પરંતુ રાત્રે 8 વાગ્યાની આસપાસ સુબોધ ખલખો નામનો એક યુવક નશાની હાલતમાં હાથીની બિલકુલ નજીક પહોંચી ગયો હતો. ગ્રામજનોએ તેને વારંવાર રોક્યો હોવા છતાં, તેણે હાથીને પડકારવાનું શરૂ કર્યું હતું. ઉશ્કેરાયેલા ગજરાજે પળવારમાં જ સુબોધને પકડીને જમીન પર પટકી દીધો અને કચડી નાખ્યો, જેના કારણે તેનું ઘટનાસ્થળે જ મોત થયું હતું.
મહિલાનો જીવ બચાવવા ગ્રામજનોનું દિલધડક રેસ્ક્યુ
આ જ હાથીએ લહનાની રહેવાસી 35 વર્ષીય માલતી દેવી પર પણ જીવલેણ હુમલો કર્યો હતો. હુમલાને કારણે માલતી દેવી ગંભીર રીતે ઘાયલ થઈ બેભાન થઈ ગઈ હતી. સૌથી આશ્ચર્યજનક વાત એ હતી કે, હુમલો કર્યા પછી હાથી માલતી દેવીની આસપાસ જ કલાકો સુધી ઉભો રહ્યો અને કોઈને પણ નજીક આવવા દીધા નહીં. અંતે, ગ્રામજનોએ હિંમત ભેગી કરી ડ્રોન કેમેરાથી હાથીની મૂવમેન્ટ પર નજર રાખી અને જેવી તક મળી કે તરત જ મહિલાને ત્યાંથી સુરક્ષિત બહાર કાઢી હોસ્પિટલ પહોંચાડી હતી.
સરકારી સહાય અને અન્ય ઘટના
ઘટનાની જાણ થતા જ બ્લોક ડેવલપમેન્ટ ઓફિસર રવિ કુમાર અને પોલીસ કાફલો ઘટનાસ્થળે દોડી ગયો હતો. વહીવટીતંત્રે મૃતકના પરિવારને તાત્કાલિક 25,000 રૂપિયાની સહાય આપી છે અને કુલ 4 લાખ રૂપિયાનું વળતર ચૂકવવાની ખાતરી આપી છે. બીજી તરફ, ખુંટી જિલ્લામાં વન વિભાગે 20 ફૂટ ઊંડા કૂવામાં ખાબકેલા હાથીના બચ્ચાને 3 કલાકની ભારે જહેમત બાદ સુરક્ષિત બહાર કાઢી નવું જીવન આપ્યું હતું.
ઝારખંડમાં માનવ અને વન્યજીવો વચ્ચેના વધતા સંઘર્ષે ફરી એકવાર વન વિભાગની ચિંતામાં વધારો કર્યો છે. અધિકારીઓએ ગ્રામજનોને જંગલી હાથીઓથી અંતર જાળવી રાખવા અને તેમને ન છંછેડવા કડક સૂચના આપી છે.