બેઇજિંગ:  પશ્ચિમ એશિયામાં વર્તમાન પરિસ્થિતિ અત્યંત સ્ફોટક બની ગઈ છે, ખાસ કરીને જ્યારે ઈરાનના સુપ્રીમ લીડર અલી ખામેનીના નિધન બાદ ઈરાને વળતો પ્રહાર શરૂ કર્યો છે. આ ગંભીર કટોકટી વચ્ચે ચીને મૌન તોડતા અમેરિકા અને ઈઝરાયેલને સંયમ રાખવા અને સૈન્ય કાર્યવાહી તાત્કાલિક અટકાવવા કડક શબ્દોમાં વિનંતી કરી છે. ચીનના વિદેશ મંત્રાલયના પ્રવક્તા માઓ નિંગે સ્પષ્ટ કર્યું છે કે જો આ સંઘર્ષ કાબૂ બહાર જશે, તો તેની અસર માત્ર ઈરાન પૂરતી સીમિત નહીં રહે, પરંતુ સમગ્ર પડોશી દેશો અને વૈશ્વિક અર્થતંત્રને લપેટમાં લેશે. ચીનનો આ સૂર સૂચવે છે કે તે હવે આ ક્ષેત્રમાં માત્ર એક પ્રેક્ષક બનીને રહેવા માંગતું નથી.

બીજી તરફ, ચીનના વિદેશ મંત્રી વાંગ યીએ એક ડગલું આગળ વધીને રણનીતિક દાવ ખેલ્યો છે. તેમણે ઓમાનના વિદેશ મંત્રી સાથે સીધી વાતચીત કરીને ગલ્ફ દેશોને અપીલ કરી છે કે તેઓ પોતાની સુરક્ષા માટે 'બાહ્ય તાકાતો' એટલે કે અમેરિકા પર નિર્ભર રહેવાને બદલે પરસ્પર એકતા મજબૂત કરે. ચીનનું માનવું છે કે મધ્ય-પૂર્વના દેશોએ પોતાનું ભવિષ્ય પોતાના હાથમાં લેવું જોઈએ. આ નિવેદન એવા સમયે આવ્યું છે જ્યારે ઈરાને ઈઝરાયેલ અને ગલ્ફમાં આવેલા અમેરિકી સૈન્ય મથકો પર હુમલા તેજ કર્યા છે, જેનાથી ત્રીજા વિશ્વયુદ્ધ જેવો માહોલ સર્જાયો છે.

નિષ્ણાતોના મતે, ચીનનો આ રાજદ્વારી હસ્તક્ષેપ બેધારી તલવાર સમાન છે. એક તરફ તે શાંતિની વાત કરીને પોતાને જવાબદાર વૈશ્વિક સત્તા તરીકે રજૂ કરી રહ્યું છે, તો બીજી તરફ તે અમેરિકાના વધતા પ્રભાવને રોકવા માટે ગલ્ફ દેશોને ઉશ્કેરી રહ્યું હોય તેમ જણાય છે. અત્યારે આખું વિશ્વ શ્વાસ રોકીને જોઈ રહ્યું છે કે ઈઝરાયેલ અને અમેરિકા ચીનની આ અપીલને ગણકારશે કે પછી બદલાની આ આગમાં આખું મધ્ય-પૂર્વ ભસ્મીભૂત થઈ જશે. આગામી થોડા કલાકો આ પ્રદેશના નકશા અને નસીબ નક્કી કરવા માટે નિર્ણાયક સાબિત થશે.