નવી દિલ્હી:  પશ્ચિમ એશિયામાં અમેરિકા, ઇઝરાયલ અને ઈરાન વચ્ચે છેડાયેલા જંગની સીધી અસર હવે ભારતના એરપોર્ટ્સ પર વર્તાવા લાગી છે. વૈશ્વિક ક્રૂડ ઓઇલ સપ્લાયની લાઈફલાઈન ગણાતી 'હોર્મુઝ સ્ટ્રેટ' માં જહાજો પર થયેલા હુમલા બાદ ભારત સરકારે સાવચેતીના પગલાં લેવાનું શરૂ કર્યું છે. એરપોર્ટ ઓથોરિટી ઓફ ઇન્ડિયાએ દેશના તમામ 33 આંતરરાષ્ટ્રીય એરપોર્ટ ઓપરેટરોને આગામી સાત દિવસ માટે ઉપલબ્ધ એવિએશન ટર્બાઇન ફ્યુઅલ  ના સ્ટોકની વિગતો રજૂ કરવા તાકીદ કરી છે. સરકારનો મુખ્ય હેતુ એ છે કે જો વૈશ્વિક સ્તરે તેલનો પુરવઠો ખોરવાય, તો પણ ભારતીય વિમાનોના પૈડાં થંભી ન જાય.

નાગરિક ઉડ્ડયન મંત્રાલયના સૂત્રોના જણાવ્યા અનુસાર, દિલ્હી, મુંબઈ, બેંગલુરુ અને ચેન્નાઈ જેવા વ્યસ્ત એરપોર્ટ પર દરરોજ સેંકડો ફ્લાઈટ્સની અવરજવર રહેતી હોય છે. માત્ર ૨ માર્ચના રોજ જ દેશભરમાંથી ૩૫૫ આંતરરાષ્ટ્રીય ફ્લાઈટ્સ રવાના થઈ હતી. આટલા મોટા ટ્રાફિકને ધ્યાનમાં રાખીને, એરપોર્ટ ઓપરેટરોને સરેરાશ દૈનિક વપરાશ અને આગામી રિફિલિંગની તારીખ અંગે સ્પષ્ટતા કરવા કહેવામાં આવ્યું છે. હોર્મુઝ સ્ટ્રેટ, જે વિશ્વના ૨૦% નેચરલ ગેસ અને એક તૃતીયાંશ તેલનો માર્ગ છે, ત્યાં ઈરાન અને ઓમાન વચ્ચે ચાલી રહેલો તણાવ ભારતીય ઉડ્ડયન ક્ષેત્ર માટે મોટું આર્થિક જોખમ ઊભું કરી શકે છે.

જો આ યુદ્ધ લાંબું ખેંચાય અને તેલના ભાવમાં ભડકો થાય, તો તેની સીધી અસર વિમાનની ટિકિટના દરો પર પડી શકે છે. સરકાર અત્યારે એરપોર્ટ પર ઇંધણની પરિસ્થિતિની સ્પષ્ટ સમજ મેળવીને ઇમરજન્સી પ્લાન તૈયાર કરી રહી છે જેથી કરીને આંતરરાષ્ટ્રીય કનેક્ટિવિટી જળવાઈ રહે. નિષ્ણાતો માને છે કે આ રણનીતિક પગલું એ સુનિશ્ચિત કરવા માટે છે કે યુદ્ધની સ્થિતિમાં ભારતનો હવાઈ સંપર્ક વિશ્વથી કપાઈ ન જાય. અત્યારે એરપોર્ટ ઓથોરિટી દર કલાકની સ્થિતિ પર નજર રાખી રહી છે અને જો જરૂર પડે તો વ્યૂહાત્મક તેલ ભંડારનો ઉપયોગ કરવાની પણ વિચારણા થઈ શકે છે.